楊英偉開YouTube頻道分享奧地利生活　4人家庭月使兩萬消費平民

62歲「港版木村」楊英偉近年舉家移民奧地利，早前他接受訪問透露預計下年攞永久居留，近日更獲邀拍攝當地廣告，簽下經理人公司，重操故業做藝人，相當犀利。

楊英偉愈老愈勇，近日已開設個人YouTube頻道，分享維也納生活片段。楊英偉行當地街市，大嘆美食。片中他大曬德文，能與檔主順利溝通，語言天分極高。楊英偉買餸時稱部分產品價錢比香港略貴，但勝在質素搭救，而他與太太在街邊食一餐飯連飲品，價錢約110元港幣，加上環境優美，楊英偉非常滿意。

楊英偉透露一個月花費大約2萬零蚊港幣，家庭使費平過香港，「我呢度停車費百零蚊港元一個月、油又平。三餐大部分自己煮，間唔中出去食，買一公斤牛柳切開有10塊8塊，可以食兩餐，牛肉就十幾歐，豬肉就幾歐，街市買就仲平，2歐10個蕃茄。」楊英偉稱，有時候外出用餐，與太太「食豪啲」，兩人只用400多元港幣。楊英偉稱希望借YouTube頻道，分享奧地利貼地生活一面，包括在街市買餸等平民日常、以及港人在奧地利生活等等。