41歲男歌手爆SEED轟夾公仔機舖被當水魚惹共鳴：你有冇良心㗎？

近年香港各區湧現大批夾公仔機，成為大家閒時消遣新玩意，但不少人都投訴在港要夾中公仔，技術運氣有齊都未必成事。育有兩女的Jason陳柏宇在Threads發帖，怒轟玩夾公仔被當水魚。

陳柏宇在社交平台上載一間夾公仔機舖的照片，疑為氹囡囡去玩但一肚氣，怒轟自己被當水魚：「個夾未上到去，個頂已經鬆手，咁我寧願你教（校）鬆啲個夾，咁起碼我都仲覺得我有一線生機。大佬呀，你喺上面咁樣鬆手，你有冇良心㗎？生勾勾咁呃咗我$25（元） …」帖文引起網民共鳴：「好認同陳生啊，香港夾公仔機個夾到頂就放根本當人水魚」、「呢間嘢係呃人㗎，$25都唔應該捐俾佢」、「陳生講中晒我們的心聲」。