廖嘉敏7年前誕下女兒一度放棄做歌手：想將所有嘅時間放喺佢身上

歌手廖嘉敏（Ashia）今日（23/9）現身九龍塘《第十二屆微電影「創＋作」支援計劃（音樂篇）》配對會暨微電影製作啓動。Ashia接受《香港01》訪問時透露，自己出道至今已有十年時間，7年前誕下女兒成為人母，因要照顧家庭曾一定被迫放棄做歌手：「當時阿囡出咗世之後，我係想將所有嘅時間放喺佢身上。而喺冇佢之前，我係準備計劃出第二張Hi-Fi碟，發現有咗佢之後，係令到個計劃有轉變。之後就喺度諗，我係咪要放棄唱歌呢？而我係明白到行歌手呢條路並唔容易，係好難行。但當我做到一啲嘢出嚟嘅時候，滿足感就會更加大。」

Ashia本身是一位臨床心理學家，婚後成為人母之後，人變得更加成熟，在歌曲創作方面會得到很多靈感：「因為本身係一位臨床心理學家，接觸好多人，令到我得到好多體會同感受，好似我首新歌《私人風呂》，其實係講緊自我關懷，希望透過歌曲令人能夠關懷和體諒自身所面對的困境，體察內心承受的傷痛。」