【任噏亂評 】《超時空男臣》勁Hea都好睇過《前度》 其實好灰！
唔知大家8點半有無睇到TVB《超時空男臣》同9點半ViuTV嘅《瑪嘉烈與大衛—前度》呢？前者未播之前有唔少網友都話套劇擺明抄韓劇《閣樓王世子》，玩穿越之外，又系由古代返現代揾返失散咗嘅太子妃。到放工漏夜用myTV SUPER睇番《超時空男臣》，睇之前都冇抱寄望，都係為應付「腦細」先焗住望一望，點知睇完嘅感覺繫好似啲賀歲片得啖笑，無咩劇情但求開心笑下，但笑下啲時間又好快過喎！笑完之後就開apps睇瑪嘉烈與大衛，ViuTV果然系ViuTV，用16：9加上下黑邊，電影感好強！加上袁澧林同劉俊謙咁靚女靚仔真繫好過睇啲綠色嘢護眼，btw成套劇就係不停拍到佢地好靚好正，畫面太美，但觀眾就死咗囉，點解？因為悶到死咗呀，睇咗好耐都唔知想講咩。好彩套劇得20分鐘咋，如果系播1個鐘嘅話，我應該會選擇去瞓覺！！！
《超時空男臣》套劇暫時嚟講我最深刻嘅唔系三位穿越到現代嘅袁崇煥、左光斗同李進忠，而系張誠。飾演呢個角色就係有「完美奸人」之稱嘅鄭子誠，佢系第一集戲份都好重，隔住嗰mon都聞到陣奸味，有幾幕佢仲要旁白，好似聽緊收音機咁（明明系奸戲嚟㗎嘛！），唔知佢會唔會出現系現代，如果有我覺得套劇會更有追看性。講返嗰三位主角蕭正楠、曹永廉同何廣沛先，蕭正楠曹永廉今次就食住《公公出宮》條水，再拍住上拍劇，我又唔太期待佢地有咩演技。但何廣沛近年就幾乎每隔幾個月就見佢有新劇出，今年3月播嘅《親親我好媽》佢飾演嘅文亮熙又pure又true嘅style，系TVB真系買少見少。今次系《超時空男臣》扮太監都幾似，而且把聲真系幾陰柔，唔知之後會唔會被定型系古裝劇就做太監呢？(希望唔會！！)只不過有好多人都話啲歷史完全錯曬，其實唔明大家點解會覺得咁出奇…TVB嘅嘢…你懂的！
實不相瞞《前度》呢套劇我真系期待咗好耐，當然系私心想睇兩位男女主角喇，始終套劇有佢地加持好似唔同啲咁。第一集雖然短短20分鐘，已經系返望表，因為真繫有啲悶，唔似之前《詭探》咁有張力，要一個鐘先夠喉。《前度》呢套劇系啱播20分鐘，男女主角幾靚仔靚女都好，劇情太悶太長會恰着咗。最重要嘅系袁澧林、劉俊謙對白真系唔多有啲失望，反而女二杜小喬講得最多（好似佢先系主角咁~），搶曬我女神啲對白,我唔系想睇你呀！！所以話呢，內容先最重要，男女主角有幾靚都無用，起碼《超時空男臣》膠得嚟都算繫有些少劇情，笑下都好呀。就好似行緊電器舖啲電視機咁，靚機永遠淨系播畫質靚到暈但內容悶到嘔嘅4K試機片，同現實電視會播嘅節目完全唔同。
