【佢家下黃色衫】主唱KZ冇睇《中國有嘻哈》：我唔識Freestyle㗎

「佢家下黃色衫，又變返著綠色衫」將Nelly的Dilemma 改詞改到出神入化的Rapper KZ，昨晚在尹光演唱會現身。他的朋友McJin在《中國有嘻哈》表現驚人，KZ怎會不知「你有冇Freestyle」點解！不過講到McJin被嫌Rap太多英文，在中國就要多Rap中文，KZ就話：「如果冇講明一定要英文嘅話，都冇所謂嘅。（唱英文會唔會有Feel啲？）咁梗係會喇，始終呢樣嘢（rap）都係由嗰邊傳過嚟。」問到rap最重要的元素，KZ就自戴頭盔：「純粹係我個人睇法咋！」他就認為：「咁內容就最重要喇。（如果為拎combo而押韻呢？）咁都冇問題，唔係為combo而唱就得喇。」問到《中國有嘻哈》賽制如何？KZ小心回應：「都因為我冇點睇，所以不宜評論咁多。」

記者就想KZ親身示範Freestyle，他立刻就話：「我唔識Freestyle㗎。我好摺㗎，平時都係暱埋填rap咋。」雖然如此，但KZ有一首膾炙人口的歌《X lama》，是改編自外國歌手Nelly的《Dilemma》，想不到一句「佢家吓黃色衫，又變返著綠色衫」，就唱到街知巷聞，唱到一開口「oh！」就知要唱KZ版本！KZ唱了幾句讓大家回帶，唱完就話自己都唔太記得：「好耐之前唱LIVE都有唱過，但係歌詞我自己填完都覺得好難記。」KZ講起首歌，就話其實《X lama》係功課！「當時就同個學生，就搵啲嘢惡搞吓，見呢首歌幾好喎，就改下囉！」就冇諗到會咁多人都識，所以都要係時候話畀大家知，《X lama》係KZ作同唱㗎！KZ仲話自己已經做咗人老竇，冇咩時間去創作：「個女而家得6個月大，同佢嘅回憶就係得換片同換片，冇題材可以寫呀！等佢大個啲先！」