無綫曹思詩出寫真　唔贊成拍AV揾錢：俾屋企人見到都醜怪

今午於深水埗舉行嘅Bubble寫真祭除了有首位到日本拍攝AV的麥紫莉外，還有曹思詩及林雅詩宣傳個人寫真集，但她們兩位嘅風頭當然比不上麥紫莉喇。現時係TVB部頭約女藝員嘅曹思詩接受訪問時就話完全唔識麥紫莉，但就知道對方下個月出發到日本拍AV，仲好霸氣咁話，「完全唔知有呢嗰人，佢係拍先算啦。佢去日本都唔知佢係拍MV定AV，你哋記得送佢機！」

聽曹思詩一番言論好似覺得對方拍AV有吹水成分，她笑言，「又唔好咁講，宣傳技巧啫。我夠可以話自己去LA拍playboy。」她認為對方要認真考慮清楚先好拍，直言其實大把工可以做未必要選擇拍AV，「如果話經濟上有壓力，唔怕辛苦嘅話其實好多工都可以賺錢。我覺得拍出黎，唔好講全世界可能亞洲都有好多人睇到，俾屋企人見到都醜怪。」問到她有無曾收過邀請拍AV？曹思詩直言係日本旅遊時有人派卡片俾佢，「我聽到就一口拒絕左。幾多錢都動搖唔到我。呢樣嘢我希望係同最鍾意嘅人發生，而唔係同全世界share！」

講返今日嘅活動，曹思詩透露自己好早就已經到達會場，仲收到男粉絲送嘅一份禮物，「我拆開之後見到一條女性內褲同絲襪，拎起手就發覺有啲不明液體係上面，好恐怖！我即刻去洗手間洗手兼消毒！」佢透露之後會到書展宣傳寫真集，但服裝就會比較密實，「始終有好多市民同小朋友，服裝方面就會正經少少。」