《九品芝麻官》尚書盧雄因病急瘦　神級配音桃李滿門：我責任心重

「嗱，今日嘅規矩呢，就係唔準講粗口，唔準提人老豆老母，唔準提性器官。」這一句屬於電影《九品芝麻官》中的台詞相信大家都耳熟能詳。周星馳的戲，他是主角夠爆笑就眾所周知，但其實有很多身邊的配角都發揮得淋漓盡致令到電影再一次昇華。《九品芝麻官》中的尚書大人就是其中一個，他的名字叫盧雄，原名盧健雄，但原來他並不是一個全職的演員，他只拍過幾部電影，其實他是一位資深的配音員。

由1975年加入商業電台開始做DJ，之後以自由身身份在各大媒介做配音工作，其中最多的便是電影。在早前播出的港台節目《守下留情》中他透露，當時在佳視的年代其實主要做演員，但當公司倒閉後有好多導演走了出去，其中一個便是徐克。這些導演本身認識盧雄，於是當電影需要配音工作時便會找上他，有時也會找他玩一些電影，於是便有了尚書大人或是《回魂夜》中的盧Sir。而他認為最好玩的電影便是《回魂夜》，他在訪問中說道：「嗰套戲我哋成兩個幾月都喺將軍澳，邊幢大廈就唔講喇，因為而家人哋住緊。嗰時仲未入伙嘅，所以有時我會喺好高層咁嗌落去，兩個幾月晚晚喺度圍住，黃一飛、黃智賢、星爺，個個好傾得埋又玩得。個個都圍住喺度，有份拍就拍，無份咪傾計或者玩吓，好開心架呢套戲。」至於《九品芝麻官》便沒有這支歌仔唱了，因為無得成班人圍在一起。那一幕星爺將半個光酥餅交給他，以及在皇上面前飛蘋果的戲，原來都是在香港的盆栽學會內拍攝。

正所謂學而優則教，盧雄亦開始展開他的教學生涯，他表示其實初初並不喜歡教人，他說：「因為又唔係好識，又要諗啲方法教到人，最衰我責任心比較重，唔係求其教搵食架嘛，你都希望教到啲人出嚟，要諗方法，所以我都幾辛苦。之後諗到方法，又教到啲嘢俾佢哋，所以而家好多配音員都係我啲學生。其實任何人任何聲都做得（做配音），因為一套戲有咁多角色，唔係把把都靚聲架嘛，如果主角到茄喱啡都係靚聲，咁會好flat，一定要有啲出入。好似我把聲咁，我未做過靚仔小生，我專係配啲甘草，都能夠生存喺呢行幾廿年，所以唔係一定話bass on你把聲好唔好。最主要係有無心，因為入行一定係人工平，你要捱，同埋而家好多後生仔一學咗少少就覺得自己足夠，呢個好弊。首先你想入行要搵啱一個師傅，唔一定搵我嘅，因為我而家都無教。你要搵一個真係帶到你入行，而家好多教到你嘢但未必帶到你入行，真係水準高都好喇，如果佢行呢人脈關係唔係咁好呢都帶唔到你入行。仲有啲係呃人嘅，所以大家要小心。」近年因為糖尿病已經甚少接工作的盧雄，《香港01》曾致電他詢問近況，可能因為需要更多休息而拒絕接受訪問，希望他早日康復，繼續教更多好學生出嚟喇！