許家傑揭TVB主席與演員談話內容　大膽舉手：好多時喺公司冇嘢做

許家傑近年憑處境劇《愛·回家之開心速遞》「送水輝」一角成功入屋，深受觀眾喜愛。曾經創業失敗的他更屢敗屢戰，今年他以7位數代理一款月餅，反應銷情好，更令他獲得獎項。對於《愛·回家之開心速遞》因停拍兩星期而令觀眾大為緊張，許家傑就向大家大派定心丸：「其實我收到嘅消息我會喺《愛回家》繼續飾演送水輝，大家唔使擔心！」

許家傑更透露早前公司行政主席許濤先生有開會同演員見面，親自解釋公司狀況，感謝許生令大家有一個交流機會：「我同公司好有信心，我都好開心大家有個正向嘅交流，佢又有問我哋問題，我都有舉手發問。（問咗咩問題？講唔講得？）我同佢講我哋演員好多時喺公司冇乜嘢做，我話希望公司有其他設施例如健身室，又話有啲workshop，因為好多藝人都係卧虎藏龍，有健身教學、有瑜伽教練、彈結他，甚至乎戲劇老師都好多，所以我覺得可以畀多啲培訓新嘅演員。如果做到，大家都會好開心。」