《超時空男臣》硬撼《前度》 撐原創定係睇大集匯？
撰文：溫菁莉
出版：更新：
話咁快又放暑假喇，即係TVB嘅一年一度嘅Amazing Summer亦已經開始。相信唔少人都會煲下劇過下日晨咁，第一擊播出的劇集就係上個月底逢星期六，日播出的《踩過界》，外界對劇集都幾好評價。而今晚8點半由蕭正楠、曹永廉及何廣沛主演播出的《超時空男臣》，接住ViuTV就會播出由袁澧林及劉俊謙主演嘅半小時劇集《瑪嘉烈與大衛——前度》，唔知大家又鍾意邊一套呢？
《超時空男臣》就講述蕭正楠、曹永廉以及何廣沛由明朝穿越到400年後的世界，他們分別是大將軍、大學士及太監。睇返網上資料，都會見到劇集概念與電影《正牌韋小寶之奉旨溝女》、《冰封：重生之門》及電視劇《閣樓王世子》有相似。睇嚟又要等一眾眼利嘅網友「名偵探柯南」上身，keep住睇先得喇！
而ViuTV播出的《瑪嘉烈與大衛—前度》，今次劇集就揾嚟四位未拍過劇集嘅演員包括袁澧林、劉俊謙、杜小喬及馬志威，唔知劇集嘅效果會唔會好似去年《瑪嘉烈與大衛》咁大獲好評呢？講返新瑪嘉烈同大衛，飾演瑪嘉烈嘅就係袁澧林，嗰嗰都叫佢文青女神，呢一年都算係影視新寵，MV劇集電影都拍埋，觀眾可以拭目而待文青女神演技。而新大衛就係演藝畢業嘅劉俊謙，去年就同男神黃子華同陳法拉合作舞台劇《前度》而聲名大噪，係潛力股之一。除了4位演員，仲有許志安、恭碩良、黃秋生同夏文汐客串劇集，真係幾吸引㗎! 咁究竟《超時空男臣》定《瑪嘉烈與大衛—前度》好睇？真係要睇過先知！