Edan呂爵安以全死角黑圖賀壽　大表哥獲爵屎送海量生日禮物反擊

MIRROR成員邱士縉今日（20日）牛一，一如以往，生日必有黑圖流出，Edan（呂爵安）喺較早時分，先出Po預告話搵到「少量」黑圖，問大家應該如何部署，並附上一張同大表哥嘅靚仔合照；數小時後，Edan上載一張大表哥素顏低炒照，並謂「？？？啱啱嗰張點會算黑圖？？？你哋會唔會太低估我？？？生日快樂@stanleysc_」

呢張全死角黑圖，大表哥收到之後亦有回覆表示：「_ _ 仔！唔唱生日歌不特止，仲要放我黑圖！你小心，君除報仇10年未晚」之後除咗喺IG早晨專區徵求Edan黑圖外，又在threads 誠徵終極黑圖，「拜托四方好友幫助，勝出者會得到壽星仔生日願望一個」。大表哥出到聲，唔少爵屎都熱烈支持，紛紛獻出Edan嘅黑圖 ，仲話當生日禮物送俾大表哥。