鍾柔美首次拍劇自爆驚邵美琪原因　傳炎明熹簽約環球竟然咁答

鍾柔美（Yumi）今日（20日）出席新劇《特勤女團》拜神。這次Yumi會在劇中與演她母親的邵美琪和演父親的關禮傑合作，她接受《香港01》 訪問表示：「佢哋好錫我，我喺劇中都做乖乖女算係做返自己。」講到邵美琪和關禮傑在劇中需要唱歌，兩位是否有特別請教她，她直言：「有㗎！佢嗰一場戲都好浪漫，都好sweet，唱歌我都忍唔住出手幫忙，因為首歌都本身係識嘅，好開心可以幫到佢哋。」

被問到邵美琪是否氣場很大導致自己會害怕，她表示：「一開頭都驚嘅，今次算係我第一次真正拍劇，我都驚好多嘢。可能因為未熟絡，但連續幾日見劇中嘅演員，之後冇咁陌生，所以大家都OK！」提到有報道指炎明熹（Gigi）會簽約環球，她表示：「我覺得最緊要就係佢做返自己，呢排佢都有搵我，都好開心嘅，我覺得大家都唔使擔心，佢好有天份，佢嘅路就交俾佢自己去揀。」