MK仔炒車笑住自拍　Bob撐：之前撞車都有Selfie，後尾仲要賠4萬

後生仔女最鍾意玩Selfie，出街食飯永遠相機食先，拍緊拖的情侶，更是頻頻Post新相上網放閃，開心事同大家開心Share，讓其他人葡萄一番，當然無可厚非，但想不到遇上不幸事件，都有人鍾意Selfie。講緊的是近日在討論區瘋傳的一張炒車相，車頭撞到凹晒兼爆開，但司機同三位乘客就毫髮未傷，仲開開心心玩自拍，笑容仲燦爛過賣牙膏廣告，隨即被網民笑他們「撞車好威咩？」、「MK仔影車頭相」，認為他們撞完車仲要呃Like，行徑相當無聊。

事主炒車自拍讓網民恥笑，但原來藝人林盛斌(Bob)都有類似經歷，一樣是撞車後自拍再放上網，而他就力撐炒車的事主，他接受《香港01》訪問叫網民不需要太過認真，他憶述之前的撞車經歷，「嗰次我同屋企人一齊，慶祝父親節去迪士尼，係我自己唔小心，在旺角撞到人哋架車，完全係我錯架嘛，梗係落車say sorry啦，仲記得嗰位係印度籍司機，佢都係載住屋企人，最大鑊係我嗰架係又殘又舊，爛鬼七人車，人哋就新落地一個月唔夠嘅Audi新款，之後我賠咗4萬蚊，真係我唔啱，最緊要無人受傷，跟住我同佢影張Selfie。」

Bob笑言當時都算是苦中作樂，令到自己輕鬆點，「我記得對方係律師嚟嘅，最好笑係第二晚佢Whatsapp我，問我係乜嘢人，原來佢第二日返工已經好多人知佢撞咗車，好多人睇到新聞同我嘅Facebook。我覺得網民反應唔需要咁大囉，講返嗰幾個小朋友，佢哋好好彩啦，大難不死，梗係影張相先，有時外國有人屋企火燭，都影張Selfie啦，總之平常心對待啦。」做人最緊要有正能量，炒車有乜好驚，拍返張靚相先啦。