中年好聲音3丨參賽者帶愛女遺物面試　「冷血」周國豐聽到眼濕濕

《中年好聲音3》日前舉利香港區海選招募，有逾千人面試。一如以往，當中不少是「有故事的人」，前樂隊Ever主音何家豪自彈自唱《擁抱這分鐘》，他喺演出前簡單介紹手上嘅結他「「大約3個月前，我屋企發生咗唔開心嘅事，我8歲囡囡因為急病突然間離開咗我哋，呢支結他係我1月送畀佢嘅生日禮物，佢係好鍾意音樂同唱歌嘅小妹妹...佢好希望拎住呢支結他上台表演，可惜完成唔到呢件事。」

演出期間，評判周國豐眼濕濕，仲表示：「我經歷咗兩季嘅《中年好聲音》，我未試過係會好觸動，但頭先嗰三分幾鐘，第一我已經同兩位評審講，我好希望你可以唱晒成首歌，因為你係用真情去唱呢首歌，係唱得非常非常感動。」而向來都感情豐富嘅肥媽亦多次抹眼淚，之後表示：「佢唔係離開，佢今日都陪咗你身邊，我哋都感受到。」何家豪坦言相相肥媽所說，並說：「如果有機會可以入到選嘅話，我都唔希望用自己個名字，我都希望代表到佢，我個女個乳名叫『桃桃』，我希望大家可以叫我做『桃桃爸爸』，或者叫我做『桃爸』，我希望可以keep住呢個聯繫。」