【港姐2017．多圖】12強執到正任你睇　17歲Mandy講DSE成績口窒窒

2017年香港小姐最後十二強終於面世，一眾候選佳麗以黑白色服裝示人，不過啲衫嘅cutting好似麻麻，驟眼一望以為係千層蛋糕，略嫌累贅。而非戲劇經理及監製陳旭亮表示今年港姐新玩法⋯其實只是由TVB Fun變成Big Big Channel，有個港姐專區，得閒開下Live而已。至於外景則是7月26日至8月1日進行，初步暫定時台灣。

今年港姐質素尚算平均，年齡介乎17-24歲，真係超young。其中最年輕的17歲港姐邱晴Mandy表現似乎超緊張，全程訪問表現都吞吞吐吐。身為應屆文憑試考生，Mandy提起放榜成績，都似乎面有難色，聲線微弱地說：「考得唔係咁好囉⋯」事後再次追問她考幾多分，Mandy都不太願透露。只講到：「都忙於處理大學嘅事，希望兩邊都兼顧到。」

問到高登巴打都十分睇好她，她笑言多謝他們的支持，仲話：「我細個嗰時都有上去望過吓嘅。」17歲的Mandy，目前都沒有拍拖，巴打都可以考慮下，而且Mandy都不太介意別人只著眼她的身材：「每個人都有自己嘅身材嘅，我就唔太鍾意自己有byebye肉。（條腰呢？）都ok，都有廿幾寸（係正常尺寸？）好在都幼同埋高嘅。」Mandy現在極力打泰拳減肥。事後同Mandy講唔好驚，她說：「我知呀，但我真係好緊張，都習慣緊㗎囉。」非常直率及純真。