林峯自爆與愛女家中齊jam歌　聞舊愛吳千語即以2字回應

林峯、胡子彤、張文傑、廖子妤、「魚蛋妹」王尹菁呢個「城寨組合」今日齊齊現身品牌活動，身穿短褲嘅胡子彤一到場即吸引大家嘅目光，更獲林峯大讚「得佢carry 到」，又話佢上身「豐滿」，胡子彤表示平時都有著裙褲，之前亦試過著皮短褲。問到林峯會否喺演唱會以裙褲示人，林峯即謂：「我唔使咁涼爽。」林峯下月嘅澳門演唱會日前正式宣布加場，問到會否減輕飛債，他說：「我從來唔理，因為搞唔掂。」在旁嘅子彤、張文傑即話自己都買唔到飛，但林峯就好快落閘：「你哋唔會有飛，你哋直接上台，我係唔會俾飛你哋。」

林峯又透露女兒到時應該已開學，所以未必會捧場，但兩父女原來不時都會喺屋企jam歌。「佢識唱我啲歌，（邊首最熟？）《愛在記憶中找你》，我老婆之前買過個結他，一撳個chord 成首歌會出嚟，我喺屋企彈嗰陣叫個女唱，最好笑佢有個細琴，話同我jam ，亂嚟咁夾band 。」而提到舊愛吳千語喺意大利嘅童話式婚宴，林峯就禮貌表示「唔答」。