女神連登公開痴男追求whatsapp　簡淑兒：最好方法都係block咗佢

有人話追女仔好簡單，不外乎靚仔、靚仔同埋靚仔，若果不是靚仔，咁富二代都一樣煞食，但若然本身其貌不揚，荷包又長期乾塘，追女仔當然難度倍增，不過又不要睇到香港女仔如此現實，風趣幽默都可以加到不少分數，但就切忌死纏爛打，近日網上有位巴打被女神公開追求Whatsapp內容，雖然被女神多次拒絕，仍然心口掛個勇字一味死衝，最後當然是陣亡兼且被放上網鞭屍，值得一眾巴打引以為鑑。

相信不少人也有過追女仔的經驗，以前會寫情信、MSN，近年就Whatsapp都可以示愛，仲可以加埋Emoji，威力大好多。但文字傳情的缺點，就是隨時會被女神Cap圖放上網，供廣大網民恥笑，近日就有近似情況在網上發生，開首大家都好同情女神，覺得她受到痴情男滋擾，甚至有絲打身同感受，表示曾經被追求者煩到癲，亦有人提議女神Block了對方，讓男方死心。但之後發現女神竟然將兵仔由5月至7月的Whatsapp內容，全部放晒上網，而且不斷更新，不少人亦由力撐女神，變成覺得女神有點過份。

同是女神級數的簡淑兒，知悉該名女網民跟兵仔的情況，連她也不撐女方，「我都覺得佢冇乜品，其實係唔好㗎，始終人哋私隱嚟，唔知個男仔會唔會handle唔到，雖然個男仔都唔啱，但某程度上都會帶俾人傷害，同埋post咗出嚟個男仔又唔會唔搵妳嘅。」簡淑兒表示自己也有遇過追求者，拒絕過後如果對方仍繼續死纏，她會選擇Block了對方，所以她建議女事主，「最好嘅方法都係block咗佢啦，對大家嚟講都係好事，等佢唔再亂諗嘢。」

在該名網民的追求Cap圖中提到，要約女方出來講清楚，被直接當面拒絕才會死心，簡淑兒就說千萬不要單獨見面，「隔住個電話佢都唔聽，出到去見面，更加唔會聽妳講嘢，佢咁激進嘅話，女仔都係盡量唔好出去，又唔係真係好熟，就算真係要出去都一班人去，但妳出去可能會俾多咗個幻想佢，佢又會覺得可能有機會喎。」但亦有男仔覺得追女仔要花點時間，無理由追兩追就自動投降？「其實Feel到個女仔對你有啲鼓譟嘅時候，就應該要停啦，就算唔令個女仔鍾意你，都唔好令佢討厭你啦。」各位兵仔留意啦，要出擊就要睇準時機，一味得個煩字冇用的。