Edan認同林明禎喺歐洲食飯:人生都未試過咁多男士恭喜我
撰文:鄺鈺瑩
出版:更新:
Edan (呂爵安)今日以白馬王子造型出席品牌活動,全程笑容滿面兼不時大派心心,唔通呢啲就係春風滿面?
Edan 接受訪問時,認喺歐洲工作期間有同林明禎食飯,但否認二人撻著。「恭喜我?未恭喜得住。今次都幾得意,人生都未試過咁多男士恭喜我,又讚我叻仔,突然間地位好似好高,唔講以為我參加奧運,好似為港爭光咁,參加明禎BB爭奪戰,多謝大家讚賞,我都覺得好榮幸,但193都回應咗啦,係193嚟嘅。」
Edan又話睇咗唔少隊友訪問,唔明點解大家唔相信。「但可惜我又真係無得認,大家睇小我?Stanley 話唔信、AK話「吓」 ,呢啲每一下都插入我心臟,咩意思先?你覺得我唔得咩!所以我警告佢哋,再亂講我行動㗎啦,唔好挑戰我好勝的心。」
Edan 又解釋歐洲行是因為工作。「同明禎本身係朋友,所以喺歐洲有食飯,但純粹食飯啫,大家唔好諗咁多,台灣係同屋企人去。」問到同林明禎有無發展空間,Edan 就話「唔敢諗,都係專注工作。(佢係咪你嗰type ?)咁我相信佢絕對係女神,我有睇佢作品,好欣賞佢。」Edan 又話唔敢再同林明禎食飯,但他表示如果有將來有好消息的話,並不介意公開。