【DSE放榜‧任噏亂評】明星路似考試 陳偉霆音樂肥佬轉讀戲劇系
DSE放榜，每逢呢個大日子，網民都好鍾意拎返當年E-kids三個人嘅會考分數出嚟講，因為佢哋夾埋係「不多於5分」，有次訪問見到E-kids同佢哋提起呢件事，佢哋笑笑口同我講：「邊有5分啊，網民真係太抬舉我，其實我哋3個夾埋係得1分咋！哈哈哈哈哈哈」政府成日叫我哋要「求學不是求分數」，我諗佢哋就係最好嘅例子。今日DSE放榜，無論幾分都好，其實分數真係唔係最重要。
點解咁講呢？我唔直接去答你，用例子答，好似香港樂壇咁，周柏豪離開合作咗10年嘅華納唱片簽TVB星夢；而TVB親生仔許廷鏗又由星夢跳出嚟去華納，聽落佢兩個就好似「交換學生」咁，又啱喎，如果將樂壇嘅唱片公司比喻做香港嘅大專院校，DSE考生比喻做藝人，藝人同邊間公司簽約其實同考生讀邊間院校一樣咁重要，因為真係好影響以後條路點發展。
TVB嘅星夢娛樂就好似IVE（香港專業教育學院），IVE係職業訓練局成員院校，入去嘅Artist個個都好似去咗十八銅人巷咁，唔會好似其他公司咁搵老師同你上堂，係畀好多實戰機會你，可能畀你主持吓節目講音樂去旅行，又或者客串吓八點半九點半劇集，再唔係就谷你狂唱主題曲入屋洗大家腦，大台總有各種機會畀你鍛鍊，絕對唔怕冇工開，最怕你頂唔順咁Chur，好似許廷鏗就係一個成功嘅例子，出咗好多隻碟、唱咗好多隻主題曲，電視劇同電影又參與過，就連演唱會都開咗好多次，學滿師之後要跳糟都大把人要，華納唱片即刻就簽咗佢，雖然TVB嘅星夢娛樂同IVE一樣，畀人感覺個名好似唔夠威，但其實佢又有佢嘅優點，夠晒Practical！
華納唱片公司就好似香港大學咁，校友粒粒都係天王巨星，劉德華、郭富城、鄭秀文、林憶蓮、甄妮、陳百強等等，真係星光熠熠，個個都唱功到家，咁點解柏豪入咗港大都要轉去入IVE呢？柏豪出道到依家，由《六天》、《傻小子》、《夠鐘》，唱到《我不要被你記住》、《Smiley Face》、《只有一事不成全你》、《無力挽回》，到佢後期結婚嘅作品《我的宣言》、《百年不合》、《有生一天》、《終於我們》，真係首首都紅到核爆，差唔多首首喺YouTube入面都成千萬點撃，算喺「First Hon」畢業。轉去星夢可能就係因為要再進修，進修乜嘢？就梗係演技啦，其實都叫有跡可尋，今年柏豪有份拍重頭劇《使徒行者2》，仲要係做同陳豪、袁偉豪孖住做主角，依家仲入埋星夢，睇嚟柏豪嚟緊都會瘋狂拍劇同唱主題曲㗎喇。
華納唱片真係好多巨星校友：
香港樂壇同教育界一樣百花齊放，咁多間學校同唱片公司，總會有個選擇適合你。咩話？考得唔夠高分，喺香港報唔到心儀嘅學校，不妨諗吓海外升學，唔好畀香港局限自己。就好似宇宙G.E.M.（鄧紫棋）同Angelababy（楊穎）咁，香港星路唔係咁順暢，但北望神州之後，兩個人都紅到發紫，身價十級上，香港觀眾唔鍾意阿G.E.M.「兒夜姨野以夜儀野」，內地歌迷就鍾意到不得了，baby喺香港畀大家彈佢個樣太「人工」，唔緊張，大陸個個整容都要照住baby個樣嚟整，正所謂條條大路通羅馬，最緊要揀一條啱自己嘅路。
除咗要揀啱學校之外，揀啱科都好重要，記得陳偉霆11年前新秀出道同英皇簽約，英皇力谷佢做偶像歌手，但都冇乜起色，跟住唱《Taxi》太膠仲畀人笑佢係「的士陳」，連黃曉明都加把嘴話：「而我不知道陳偉霆是誰。」把心一橫William北上拍劇，第一部劇同阿嬌、楊冪一齊拍《古劍奇譚》已經小有名氣，之後拍完《少年四大名捕》同《老九門》之後，喺內地紅到震，年收入已經過億，由音樂系轉做戲劇系係佢做得最正確嘅選擇。
輕鬆吓啦，DSE遇上挫折絕對唔可怕，因為人生仲會有更多挫折等緊你去面對同克服。