巴黎奧運｜網民對運動員做評述意見多 張小倫爆SEED：積下啲口福
撰文：洪曉璇
出版：更新：
香港男子擊劍運動員「大師兄」張小倫今年4月剛宣布退役，結束20年全職運動員生涯。退役後今屆巴黎奧運換個身份再次參與擔任HOY TV劍擊比賽直播評述，但他突然在社交平台爆SEED，望大家尊重運動員及在電視台做旁述的運動員：「積下啲口福﹗」
巴黎奧運｜運動員任評述受抨擊 大師兄張小倫：只想保護師弟妹！
張小倫寫道：「做香港運動員就係咁，一有成績就係到呱呱嘈，冇成績就係到X，咁細個地方岀到奧運冠軍級別運動員，你估容易丫！要犧牲幾多代人嘅努力同付出，犧牲幾多位運動付出嘅年輕人，你又識得幾多個？？？唔該大家評論運動員去唔同電影（視）台做旁述嘅時候，積下啲口福，個個捱更抵夜去講專業運動知識俾你哋聽，雖然我哋唔係專業，但係我哋係流住運動員嘅血，係一世㗎，希望分享多啲運動員嘅經歷。」
20年全職運動員生涯，張小倫深明當中辛酸：「有得去參與奧運嘅運動員，我哋當然要幫佢哋打氣，冇得去嘅一樣喺唔同崗位默默努力，不論輸贏係咪都要尊重啲運動員，佢哋用人生最青春嘅時光﹑用努力意志去克服唔同嘅比賽同傷患，希望可以有一日踏上頒獎台，證明自己。其實冇得去參加奧運嘅運動員，都好大勇氣行岀來去做運動旁述，仲要比大家批評，我性格就係咁有個句講個句，唔鐘（鍾）意我哋嘅好似睇電視一樣，撳個掣轉台或者熄機。講完今晚繼續OT，香港運動員無論你哋輸贏，永遠係我心中都係世一。」