炎明熹傳續約無綫要準時出糧　潘靜文爆：簽約冇寫明幾時出糧

炎明熹離巢不續約的傳聞越演越烈。之後有傳媒報導指炎明熹續約要求之一，是要求TVB要準時出糧，此報導一出，令網民有很多誤解。

前日（26/7）《聲夢》小花潘靜文（Sherman）現身電視城出席《TVB 2024巴黎奧運直播基地啟動禮》。Sherman接受《香港01》訪問時表示：「其實我哋簽約係冇寫明幾時會出糧，同埋自己都知道出糧唔定嘅，自己都預咗。其實我哋公司每月都會一定會轉賬出糧，但就個金額就唔定嘅。金額係睇你做咗幾多嘢，係多勞多得。（有冇試過幾個月冇出糧？）之前試過。初時玩完比賽冇嘢做，但而家Keep住係有嘢做。好似拍劇咁，拍完都唔會即刻出，可能係播出後兩個月先會有。（咁遲收到，會唔會造成經濟負擔？）如果話冇就假嘅。變咗自己好多嘢都要衡量吓，有錢嘅時候就唔好使晒，要積穀防饑。如果嗰個月冇錢出糧，我都會同屋企人講唔好意思俾唔到家用。不過有時一大舊錢出糧，收到又真係好開心㗎，只係遲啲攞啫。」