陳蒨葶唔覺「中2生」有小圈子　努力儲歌將與「五癲」有搞作

陳蒨葶、黃劍文、林鉫徫今午（21日）出席「TVB全城迎奧運」活動，並以歌聲為香港運動員打氣。《中年好聲音3》近日進行海選，陳蒨葶話日前返公司時剛好遇上一眾參賽者。「見到佢哋全部都好緊張，自己去搞下氣氛，俾啲支持佢哋，有叫佢哋當評判係觀眾，同埋要好好保暖，唔會叫大家唔好緊張，因為自己當年都好緊張。」

另外，提到有Fans不滿「中2生」搞小圈子，其後肥媽更爆「輕鬆啲」權力十足，陳蒨葶表示：「節目組點安排我哋係無得出聲。（會唔會有班人自己玩開，其他參賽者機會少咗？）唔會，紅白係頭14個去做，無話咩小圈子，『中2』真係好團結，譬如之後演唱會都唔止14個。」提到古淖文將舉行演唱會，陳蒨葶表示為對方感到高興，自己亦在努力儲歌，而「五癲」接下來亦會有新搞作。