《詭探》播完有咩睇？ 袁澧林劉俊謙接棒做《瑪嘉烈與大衛》
撰文：溫菁莉
出版：更新：
ViuTV劇集《詭探》剛開始播出嘅時候，因為撞正TVB播返10年前的倉底劇《蘭花刼》，雖然收視係點無人知，但就成功引起唔少話題。而《詭探》上星期五就播出大結局，可惜劇集疑似為下一季留伏線，引來不少負評。而接下來ViuTV將播出嘅劇集就是改篇自南方舞廳的同名小說《瑪嘉烈與大衛系列- 前度》。
唔知大家記唔記得Viu首部自製劇便是由林保怡、周家怡、潘燦良主演的《瑪嘉烈與大衛系列 - 綠豆》，劇集更破天荒採用邊拍邊播形式，令劇情經常緊貼新聞時事與社會熱話，口碑非常好。而將於下周一(17號)播出的劇集《瑪嘉烈與大衛系列 – 前度》就換上一眾年輕新面孔演員，有文青女神之稱嘅袁澧林、劉俊謙分別飾演年輕版嘅瑪嘉烈與同大衛、另外仲有杜小喬及馬志威，而佢哋4位演員嘅共同點都係第一次拍電視劇。
效果係點要下星期一先知，但只得一班年輕演員點得呢，套劇仲有黃秋生同許志安，仲有現時正為TVB拍攝劇集《逆緣》嘅夏文汐參與演出！據知，今次《瑪嘉烈與大衛系列 – 前度》同《詭探》一樣，於晚上9點半播出，每集30分鐘。 其實《詭探》當時只播30分鐘亦引起不少網友爭議，因為30分鐘完全唔夠喉，扣埋廣告時間劇集就得返22分鐘。
但最值得留意嘅係，今次劇集並非沿用之前《綠豆》邊拍邊播嘅形式，當時呢種拍攝方式雖然創新，但就難為了一班演員，當時《綠豆》飾演大衛嘅林保怡就曾講過邊拍邊播會影響拍攝進度，怕之後一日要踩十六至十八小時。今次拍完先播，演員們當然無咁辛苦，仲經常上載幕後花絮到Instagram俾fans先睹為快。