沈月大爆媽咪邱淑貞唔俾拍戲 推戲多不勝數：佢驚我辛苦

邱淑貞大女沈月今日（4/7）現身銅鑼灣出席著名品牌活動。提到近來踩入主持界為爸爸旗下服裝品牌擔任主持，在快問快答環節訪問嘉賓，盡顯口齒伶俐。沈月接受《香港01》訪問時表示：「其實我第一次做主持，感覺每一樣嘢都好新鮮。不過有時候我都問過媽咪先，問佢我問呢啲問題好唔好呀？媽咪係會俾意見嘅，變咗佢係俾咗好多靈感我。」

被問到會否想拍戲？沈月表示：「暫時我係未諗拍戲住，不過係有好多人搵我拍戲，係多到都數唔到。（媽咪唔想你加入娛樂圈？）媽咪係唔想我咁辛苦，不過如果到時候我想嘅話，媽咪都係會睇我嘅。因為我做咩，我Daddy媽咪都好支持我。但係佢哋最驚我辛苦。（所以做主持！）半個主持啦，我想好似你哋咁問問題，覺得好Cool。」