衛詩雅一年拍六套戲自嘆「好彩」 曾冇錢畀家用一度想轉行
沒有留意娛樂圈的人聽到「衛詩雅」，大家可能會覺得有疑問：「究竟係連詩雅定衛詩啊，你係咪打錯字？」但今年相信衛詩雅這個名字對大家來說不再陌生，她今年一共有六部電影上映，由年頭排到年尾，只要你走進電影院，總會有一部電影是她有份參演的。
今年絕對是衛詩雅上位的好時辰，她自己亦落重注碼：「呢兩年真係叫做比較好彩，我就想趁呢兩年全力擺晒喺工作上，有時間我寧願去準備角色，都好過諗下個男友係幾時有。」男友都不要？
「好好彩」是衛詩雅最常形容自己際遇的一個詞
「上年係我可以好好彩嘅一年，工作畀我嘅開心感遠超過愛情，拍咁多套戲真係好過癮，我好鍾意拍戲啊真係，前幾日拍咗十幾個鐘，六七點先返到屋企本應該好攰，但我覺得就好正、好興奮。」衛詩雅不是一個天生的演員，在進入演藝圈之前她是沒有試過演戲，第一部TVB劇《四葉草》打開她的演藝之路，自此她就欲罷不能，的確，能夠代入角色，演活另一個人的人生，是一件很「Amazing」的事，但並不是每個角色都是那麼「美味可口」，如果要你代入做慰安婦，你覺得你可以嗎？
電影《失眠》是前陣子的話題之作，衛詩雅在裡面的角色就是慰安婦，「嗰陣做準備功課嘅過程令我覺得好難，可能因為我係女演員，你要我係咁睇慰安婦嘅片我唔可以避開，又要代入角色，嗰兩個月我係好唔舒服，好好彩之後接住有套戲拍，可以換新一個嘅身份。」又是「好好彩」，做演員不是吃自助餐，你愛演什麼就挑什麼角色，衛詩雅沒有「揀飲擇食」，她抓緊每一個機會，接到劇本之後，她就會切換一個身份去準備，「我會用嗰個人嘅思想寫日記，改變生活習慣，改到嘅野我都會改，我嘅裝扮、我鍾意既顏色、床單、音樂、氣味，有時我拍完劇之後睇返啲日記毛管戙，覺得唔係自己，好唔衛詩雅，好似精神分裂咁！」
外表看起來甜美性感的衛詩雅，從小到大都沒有試過跟別人告白，沒辦法人長得美，不用表白都一堆人在追求，「如果我好鍾意一個人，我會比好多Hints佢，會主動約佢搵佢，但我一定唔夠膽表白，呢個已經係去到最盡嘅衛詩雅。」撕開華麗的包裝之後，原來她內裏是一個很重家庭的獨立女性。
現在年輕人出來工作之後，最大爭議的話題就是「畀幾錢家用」，經濟低迷物價又高，惟獨薪水很低，家長們都寧願子女多存點錢少給點家用，但衛詩雅堅持無論自己多困窘，都要給爸媽家用，「屋企好擔心我問我幾時有戲開、套戲幾時上，我扮有戲開話係啊嚟緊有㗎，但其實係冇，入行第三四年嘅時候香港電影好慘，我一年係拍唔到一套戲又或者得一套戲，生活成問題，當時又要租屋又要畀錢屋企，我係幾唔掂都唔可以唔畀屋企嘅人嚟，有次因為真係冇錢冇得畀家用，就忍唔住問問自己係咪繼續要喺呢一行呢？」
大家仍然在熒幕上看到她，當然她就沒有離開這個陰晴不定的演藝圈，於我看來，於對未來的路，她有這一種想法：「我覺得成唔成功係在於你嘅心態，你要後悔嘅，永遠都有你後悔嘅點，我可以咁諗，我做咗十年都係咁唔穩定，但可能我十年前冇入行，我都會好後悔自己可能做演員更好，冇得後悔嘅，你要做嘅野就係要好好Enjoy依家嘅一切。」
如果當初她沒有入行拍劇，衛詩雅現在會是在做什麼呢？「應該喺青山，哈哈哈哈，係個精神病人，哈哈哈哈，我冇做呢行或者會繼續做珠寶，唔知呢，可能我會覺得會，做兩年就唔做，真係唔知。」
如果有平行世界，世界上另一個你又會在做什麼呢？