【天地豪情】羅嘉良20年神劇仍未out　「撇女三大原則」正過潮文

TVB昨日凌晨時段重播1998年的《天地豪情》，雖然已經重播過三次，不過依然大把人討論，受歡迎程度甚至還多過黃金時段的劇集。當時平均收視約32點，每集接近有200萬觀眾支持，黃日華、羅嘉良、陳錦鴻、張家輝、郭藹明、周海媚、宣萱同蔡少芬，無論放在以前抑或現在都是卡士十足，個個都是好戲派。飾演大頭文的羅嘉良更憑此劇獲得1998年《萬千星輝頒獎典禮》最佳男主角，第二度獲得視帝殊榮。

做得視帝，撈家在劇中一定有高水準的發揮，當然佢好戲已經唔需要再多講，一個角色要出位最重要是要有一些經典的對白，例如當年黎耀祥在《巾幗梟雄》飾演柴九時說的「人生有幾多個十年」，又例如《溏心風暴》中司棋姐飾演凌巧（大契）的一句「呢度唔係法庭，唔需要證據，我對眼就係證據」，那麼大頭文當然都有喇，就係「做人樣樣都可以輸，但係信心就唔可以輸」簡簡單單兩句說話就激勵了不少人心，連近年大賣電影《激戰》都有類似的對白，所以當年呢句真係好hit架！

除了金句，其實還有一些看似搞笑但又十分有深度的對白，有一幕戲是大頭文教人如果跟女友分手，他講出了三個要點稱之為「撇女三大原則」。第一點是點找一個公眾地方，愈高級愈好，因為女方為了顧及面子不會在這種地方發脾氣。第二是一定要約中午食飯的時間，因為食完她一定要趕回去返工，所以無時間糾纏。第三就是要「有咁決絕就咁決絕，有咁臭就數到佢咁臭」，等她覺得沒有挽回的機會。不知道當年有多少人真的跟以上的橋段用來分手呢？