方皓玟一餐飯被傳與冼靖峰發展姐弟戀感無奈：都要食飯㗎

方皓玟（Charmaine）早前亮相無綫音樂節目《J Music》與冼靖峰（Archie）合唱歌曲後被傳撻著。有指他們節目過後更有約會，齊齊到尖沙嘴餐廳食飯，疑似發展相差 18 年的姊弟戀。今日（18/6）Charmaine和Archie現身尖沙咀出席無綫年度大型籌款節目《明愛暖萬心》記者會。

對於被指發展姐弟戀，Charmaine接受《香港01》訪問時說：「其實睇到呢啲新聞，我就覺得冇乜所謂，因為都係謠傳，而且大家都係得啖笑。咁所以就唔會太過上心，又或者咁執着呢件事，因為食飯都係一件好普通嘅一件事嚟。如果想再食飯咪再食飯囉，唔需要因一單新聞影響大家做朋友。（再食飯唔驚人哋話你哋撻著？）冇得驚，咁你唔係，都要食飯㗎，大方啲好。」Archie接著說：「其實嗰次事之後，我都即刻Send短訊俾佢，有啲咁嘅新聞出咗我係覺得唔好意思。我自己作為藝人都好希望專注喺自己嘅作品上。」