黃劍文為慈善演唱會忍痛戒口唔食煎炸食物：希望能夠保住把聲

黃劍文（Kimman）今日（12/6）現身中環出席《我們都是唱這歌慈善演唱會》記者會。黃劍文受訪時表示：「今次我喺呢個騷度，我係要唱一啲經典嘅歌曲，而且呢啲歌係我好少唱嘅，不過呢啲歌曲同我哋喺香港成長嘅文化有關，變咗呢兩日不停咁練習，同埋開始要養靚把聲，就好似之前備戰《中年好聲音2》嘅時候一樣，唔好食一啲煎炸嘅嘢同埋油膩嘅食物，同時都要飲番多啲水，又要沖啲蜂蜜滋潤吓個喉嚨，希望能夠保住把聲。今次呢個騷除咗會唱合唱歌之外，我都會唱3首單曲，但就唔會連續咁去唱，係會配合唔同嘅年代成長故事，我哋就會穿插唔同嘅歌。當中自己比較耳熟能詳嘅歌，就一定係莫文蔚首經典歌《如果沒有你》，希望到時會有新嘅演繹方式俾到大家。」