東張何伯忘年戀成熱話　森美投訴老婆冇煲湯：你睇何太幾好

森美今晚（1/6）現身將軍澳電視城出席《萬眾同心公益金》節目直播。對於何伯何太忘年戀近期成了全城熱話，森美接受《香港01》訪問時表示：「其實而家最重要就係何太係咪真心。以佢哋而家嘅狀態最好去到5年，如果何太仲喺度，就起碼有一半真心。如果再去多5年，咁啲仔女就唔使擔心。」

森美續說：「其實睇到單新聞，係戥何伯開心。因為一個老人家，有一個後生女喺佢年紀當中，有人錫佢同照顧佢，若然係真嘅話，咁當然係假嘅話呢個都係佢自己嘅選擇。因為冇人話喺戀愛當中一定會搵到一個好好嘅人，咁所以搵到渣男同渣女絕對係唔出奇嘅。（你多唔多去街市買餸？）我而家開始要去街市買餸。（驚唔驚有人煲湯畀你飲？）我不知幾鍾意飲湯。我都有同我老婆講，你睇何太幾好，你應該做多少少，我仲同佢講，我成副身家都係你度，都仲未有湯飲，可唔可以捽吓大髀仔，佢即刻反我白眼，哈哈！」