【賭城群英會】眼鏡娘文凱玲捱足7年　15歲做兼職：喺天橋派傳單

2010年當時文凱玲27歲為空姐，她參加香港小姐，最後落選，當年冠軍為陳庭欣、亞軍張秀文，她落選後翌日即開工，她要搏命搵錢，因為她是家中的經濟支柱之一，她說：「屋企除咗我之外，其餘都要爸爸養，我係大女自然會想幫下屋企，當時其實空姐如果肯加班都幾好搵，都有3至4萬，但我都俾一半以上屋企，同埋好多我都會儲起佢，以避不時之需。」儲錢應付不時之需，不是用來買限量版名牌手袋，而是留給家人，據知她的家人試過中風，亦過做手術，每次文凱玲都有幫手，但文凱玲不欲多提起，但她心明有錢傍身的重要，到現在都是一名非常慳家女。

文凱玲雖然是孝順女，但是晶女郎在網友心目中等同原罪，提起王晶、女演員，網友的留言一定辛辣，不過她沒有介意，家人亦十分支持，她說：「除咗《鴨王2》之外，我屋企人全部同我一齊睇哂，爸爸媽媽由細到大好支持我，我記得《唐伯虎衝上雲霄》有一幕我係好清楚見到我背面嘅下半身啦，我都有望下我老豆有咩反應，但佢又無嘢喎，我先放心，佢哋同我講，呢個係我嘅人生，我應該自己做決定，媽咪會擔心我而家單身，但又咁性感，會唔會無人要㗎。亦會驚我太大壓力。」

文凱玲當年港姐落選後並沒有簽約，因為那時樂小姐就勸她出外發展，更對她說在無綫要等10年才有機會上一線，文凱玲很感謝當日樂小姐的坦白，她說：「佢係好老實咁同我講，我覺得係好事，佢可以氹我簽咗先，話大把嘢做㗎，但佢真係有為我諗囉，而諗返起當日簽唔到無綫，都以為自己再冇機會，嗰陣都好失落，咁亦都好彩之後有機會拍電影，亦做過女主角。」文凱玲拍過《鴨王2》三級片（其實因為結局太暴力才三級），加上王晶，令她有不少壓力，她說：「而家啲留言好咗好多㗎喇，嘩，以前真係……哈哈，我覺得有人鬧，好過冇人理你喎，同埋如果有努力，相信大家會見到，簽約晶哥前都有講，一定會被人寫，不過呢啲都唔係新聞，我當年32歲都有人夠膽簽？我仲有咩好驚呢？」