【警訊】惡搞鄭嘉穎《鐵馬尋橋》經典慘叫 奸人堅哥：導演傑作
當有人鬧本土電影《今晚打喪屍》如果要cult請cult到盡，另一邊廂，港台節目《警訊》切切實實示範甚麼是「Cult之巓」。新一集《警訊》講到公眾地方的猥褻行為，以及入房爆格這兩個普通題材，導演再一次突破cult片新境界，要玩一於玩到盡。令本來題材嚴肅的《警訊》，充滿幽默感，網民睇完不禁睇到拍手讚好。
講到公眾地方的猥褻行為，雖然用out爆、而家90後後生仔都唔會玩嘅「真心話大冒險」（True Or Dare）入題，但你有冇諗過《警訊》會咁？冇！其中一人玩遊戲輸了就要在沙灘上赤裸行走，係就係低成本少少，明眼人都知打咗格都唔會掩飾到條肉色底底，只不過呢個根本就係發揮cult片的精神，成本低都會照做，最緊要大家buy！係就係幾搞笑，但至少觀眾睇完、恥笑，都get到做人千祈唔好咁傻，爆下自己大鑊咪算，何必要野外露出呢？
話題一轉，就講到偷竊。這個話題由盤古初開都發生了不少次，《警訊》講到口水都乾埋，但係騙徒手法層出不窮，導演個腦都係，所以今次唔玩老正，惡搞一下。大家都好熟悉的御用奸人堅哥又出場，毫無懸念地又再做奸人。今次他飾演速遞員，揸住電單車出場，誰不知一除頭盔後，堅哥爆咗句：「3條45個0，Call我吖！」原來係扮緊鄭嘉穎！網民大讚呢個look好有誠意，睇完即刻「噗」一聲笑出嚟。
未完㗎！未完㗎！後來堅哥走入屋爆人格，屋主返到屋企，見到一片混亂，首先抱頭，然後忍唔住崩潰，大叫：「啊！」一次都不特止，仲要加多幾個倒鏡…咦，點解咁熟口熟面嘅？《警訊》再一次向鄭嘉穎，兼且TVB致敬，將《殭》加《鐵馬尋橋》…「人在遠方，蟬沒有和唱…啊！！！！」真係好有畫面，完全融合埋一齊，導演今次放大絕，超晒班。事後問到「御用奸人」堅哥，他就大讚：「導演傑作！」問到堅哥知唔知自己扮緊鄭嘉穎，他非常可愛地說：「我而家先知咋！」但鄭嘉穎似乎是導演的靈感來源喎！堅哥話：「啲橋佢諗嘅，可能係都未定。」《警訊》越拍越大膽，尺度好似無限向上開拓緊，堅哥就好有信心，表示：「又唔係拍三級！」