張繼聰自爆瘀事請修哥坐竟被「教訓」：原來佢出晒名係唔會坐

張繼聰今日（14/5）現身土瓜灣出席《無限楓騷演唱會2024》項目綵排。張繼聰接受《香港01》訪問時表示：「好榮幸得到修哥（胡楓）邀請做佢演唱會嘉賓，好記得我第一套拍嘅電視劇就係同修哥合作，喺修哥身上係啟發到好多嘢，講緊做呢行嘅態度，同埋佢嘅養生之道，都係我學習嘅榜樣。」

張繼聰記憶猶新指和修哥拍劇時，發現對方經常站立：「修哥除咗食飯嘅時候會坐之外，其餘時間喺片場時都會企喺度，又或者行來行去，佢係好健康。我試過請佢坐諗住孝順吓佢，點知原來修哥出晒名係唔會坐，就先知自己唔識嘢。修哥話我知佢入行咁多年，佢行過咁多路，如果拉條直線，係可以圍繞地球幾圈。」