【Big Big Channel】一蚊Joe生仔直播　老婆痛到喊呃like去到盡？

Big Big Channel上周五（23日）正式上架，由於此乃公司重點發展項目之一，所以全台藝人、甚至連幕後工作人員都要上下一心做直播！ 人稱「一蚊Joe」又或者「Master Joe」的游莨維今年初在IG宣布老婆Clara懷胎6個多月，並透露預產期是7月14日，不過，BB可能想早啲出來感受香港回歸廿年的氣氛，所以今早已搶先出閘了。

開心事當然值得Share，所以一蚊Joe今早就選擇用Big Big Channel同大家直擊老婆生仔過程……片段一開始，在產房門口的一蚊Joe不停話好緊張、好驚，到老婆入鏡之後，一蚊Joe的對白就變為「加油呀老婆！」、「放鬆啲」、「好快就收工。」之後又播歌藉此令氣氛輕鬆一點。要知道，生仔係十級痛，Clara喊都好正常，但身為老公的一蚊Joe，由於一隻手拎住電話做直播，另一隻手同樣都係拎住電話影相，所以莫講話拖拖手打氣，就連抹眼淚都唔係好做到……為咗做live，真係值得？BB出閘後，一蚊Joe依然機不離手，但都醒起要同老婆講聲「辛苦你啦」、「I Love You」。之後，一蚊Joe在醫生的協助下，完成剪臍帶動作，直播亦就此告一段落。

有諗過停機

新手爸爸一蚊Joe接受電話訪問時，透露已為仔仔取名Morgan。「因為老婆那公司上班，我有一次做她公司的晚宴主持，大家都是這樣認識，所以一早已諗好仔仔叫Morgan，中文名就留比長輩改。」一蚊Joe指仔仔屬於中B，重7磅，特徵是頭很大。「剛剛才終於抱到他，感覺很複雜，看t着老婆懷胎十月，但剪臍帶就那一下子，BB喊時，我先醒覺自己唔再係Joe而係人哋爸爸。」問他會否因要做live而忽略了老婆的感受，Joe坦然看到太太喊時 ，曾掙扎過應否停機。「其實我飲咖啡或者臨瞓前做live都得，之不過我想同大家分享這個moment，之前亦都同公司溝通過，他們有問過法律部門咁做可唔可以，所以你見我有寫『慎入』。個live都係偷雞做，有風險，因為我完全唔知入到產房有什麼程序，剛剛醫院同我講有影到其他醫護人員，想我可以遮一遮，我而家諗諗可以點搞，或者之後會delete咗條片。」