逆天奇案2｜馮盈盈為演活角色自掏腰包跟泰臣學戲：上咗40場戲

馮盈盈今日（23/4）現身荃灣出席無綫熱播劇集《逆天奇案2》宣傳造勢活動。馮盈盈在劇中飾演張喜，是一名頂級黑客，與喬天祖（高鈞賢飾）是男女朋友關係，同時劇中更會與許浚森（陳展鵬）有一夜情。盈盈接受《香港01》訪問時表示：「其實我為咗呢個角色，我特登搵咗泰臣私教學戲，仲要一對一咁學，呢套劇我有幾多場戲，我就搵佢學。我估我同佢上咗有30至40場戲咁多，試過一日排戲由日頭排到夜晚9點幾。」

被問到有否被對方責罵？盈盈笑言：「有呀！佢話我份人好認真，仲有過分執著，要每一樣嘢都要做到十全十美，於是就會令到個人好緊張，令到個表現好差，咁所以佢就即日叫我要放鬆啲，咁樣先可以令到個人容易投入。咁所以有好嘅評價就係泰臣嘅功勞，如果唔好嘅評價就係我嘅問題。」