梁思浩獲「鐵板神算」董慕節指點 爆大師開筆要呢個價錢

梁思浩今日（23/4）以代言人身份現身圓方出席《先知命局》命理應用程式發佈會。對於八九十年代紅極一時的命理大師「鐵板神算」董慕節昨日傳出逝世消息，享壽101歲。梁思浩接受《香港01》訪問時表示：「好耐之前，因為佢同霑叔（黃霑）好熟嘅關係，我有幸見過佢。而當時佢寫咗4句字畀我，而呢4句字連麥玲玲師傅睇過都話佢好犀利。因為佢能夠知道你個局，佢就會叫你小心啲咩人，而其他嗰3句我就唔講，因為怕得罪人。」

思浩續說：「而其中一句係我一生裡最謹記，就係佢叫我留意姓氏有十筆劃嘅女性，叫我千祈唔好有任何接觸。我諗喺我人生最低潮嘅時候，我係遇到姓氏有十劃嘅女性，我就唔開名，留返畀大家去估。（佢收費係咪好貴？）我諗當時你畀幾多錢佢都未必會幫你開筆，佢當時佢畀面黃霑，先贈咗我4句字。我知道香港好多有錢人都搵佢，你要佢開支筆，你冇60萬至80萬，佢係唔會幫你開筆寫。咁所以令我終身受用，就好似16年嘅時候，我將香港所有鋪頭買晒套現，原因係我知自己嘅命格。隨後幾年又撞正疫情，好在提早放棄晒所有，如果唔係可能爭落周身債。」