邵音音大埔寓所被爆竊心有餘悸　慘呻冇工開：可唔可以唔好偷我哋

邵音音（音音姐）今晚（20/4）現身銅鑼灣出席電影首映禮。提到早前其大埔村屋遭賊人爆竊，損失財物，音音姐在接受《香港01》訪問時心有餘悸：「事情發生咗之後，每日提心吊膽，晚晚瞓唔着，每晚都驚，所以咩叫做嚇死呢，就好似自己嚇自己咁。講真呀，我同余慕蓮好睇唔好食，名就鬼咁大，工又冇得開，唔好偷我哋啲嘢，我又冇工開，又冇收入，想申請公屋又唔夠條件，高尚住宅區我就只可以經過同埋睇吓啫，可唔可以唔好偷我哋呀。」

對於今日有傳時裝設計師文麗賢離世消息，音音姐表示：「以前大家都係名人，而且佢係模特兒界係國際級，而我因為喺香港拍咗好多邵氏嘅戲，有時會出席一啲派對而認識見過面，佢真係好靚，希望佢一路好走。」