【娛樂回歸20周年】97年你一定識唱的兒歌　17年香港已再無兒歌

主題曲： 《問題天天都多》歐倩怡    

片尾曲：《小丸子的心事》何韻詩

當年歐倩怡與何韻詩都是新人，後者是新秀冠軍之餘更是梅艷芳的徒弟，大家亦會記得梅姐是卡通片《IQ博士》主唱者，可能何韻詩或多或少有受師父影響。至於歐倩怡與郭晉安結婚後，就開始淡出娛樂圈，但她與小丸子已被觀眾劃上等號。而《櫻桃小丸子》可算是播足咁多年都仍然有咁多粉絲睇的卡通片，如果你係粉絲一定知道小丸子嘅同學叫咩名，口頭禪係咩。例如花倫同學見到每一位同學，一定講「Hey~baby」然之後撥一撥啲頭髮。《櫻桃小丸子》在香港威力都幾大，在尖沙咀就有小丸子專門店，而早前有以小丸子為題的cafe，仲要排好耐隊！今年年初台灣更將《櫻桃小丸子》拍成真人版，成功引起不少話題之餘，亦勾起小時候睇卡通片的回憶。

主題曲：《魔法咕嚕咕嚕》滕麗名

大家可能完全不知道其實滕麗名都是新秀出身，同屆參賽者包括陳奕迅和楊千嬅等，可惜最後因狀態欠佳而無法進入五強。雖然滕麗名無法成為樂壇歌手，95年以旁聽生身份入讀第8期無綫電視藝員進修班，其歌喉亦獲無綫賞識，繼而開始擔任兒歌的主唱者生涯。同年，她亦開始接觸演戲，第一套參演的劇集便是經典劇《真情》。講返《咕嚕咕嚕魔法陣》的故事，男主角仁傑雖然是勇者，但最叻就係逃走！因為身手敏捷，輕輕鬆鬆就避到魔物的攻擊。而女主角歌莉是米古米古族的最後傳人，最擅長的魔法是將魔法無效化，但魔法陣經常畫錯！而這個時刻，就會殺出結他他老伯，有睇開就一定會識跳他的招牌結他他舞，真係俾主角更搶眼！

主題曲：《我愛毛查查》古巨基

94年踏入樂壇的古巨基，當年除了大家熟悉的《歡樂今宵》及《友共情》，都有為卡通片唱主題曲，就好似《外星毛查查》。一定要提的必定是2000年TVB下午播放的兒童節目《至net小人類》，因為其主題曲都是由基仔獻唱，90後的讀者一定識唱！至於這套卡通片《外星毛查查》你都睇過，得罪講句你年紀有返咁上下，因為由1995年開始播直至1997年，之後就已經無播過。所以1997年之後出生的朋友一定未睇過，但睇過的你又記唔記得點解會有毛查查的出現呢？其實就係主角空夫有一日想離家出走，就遇到同樣離家出走的外星人毛查查，從此之後就一齊空中旅行。當中遇到好多有生命危險的事，但最後當然係相安無事啦。

主題曲：《美少女戰士》 王馨平、湯寶如、周慧敏

其實《美少女戰士》每一年播放都有不同的歌手唱主題曲，但要數到最經典一定是由周慧敏、王馨平及湯寶如主唱的這一首，當年3位被傳媒封為寶麗金三小花，她們在公開表演時更穿上水手裝配短裙唱《美少女戰士》，猶如《美少女戰士》真人版。至於這套《美少女戰士》更是不少女孩當年一定要摹倣裏面其中一個角色，最多人扮一定係月野兔，又係主角又有把長長的金髮。相信你亦都會買過《美少女戰士》的魔法棒，然後係屋企講「我代表月亮嚟懲罰你！」，諗返起都幾好笑。而去年亦是《美少女戰士》20周年，就有化妝品牌推出一系列《美少女戰士》化妝品，不少女仔都荷包出血，因為實在太靚，唔買唔得！