【Ben Sir開Show】廣東粗口諧音搞gag　「污肛自吻」係環保人士

歐陽偉豪（Ben Sir）於Star Hall舉行「Ben Sir開Show」，除了有廣東話講唔正的季蘋蘋做班長，麥美欣都有登場，仲同Ben Sir研究網民網名點反映出佢做邊行，好似「套裡囊」咁，Ben Sir就話人哋係做藥劑師，「傷莖娛賓」有個莖字就係生物學家，「污肛自吻」會自己解決咁有手尾，大概是個環保人士，最後一個「蒸翼」就...Ben Sir話自己都有蒸開喎。到陸浩明(6號)出場時，Ben Sir竟然叫錯6號做陸永，好彩兜得返：「緊係6號啦，我特登搞錯搞Gag咋。」兩人即場研究博大精深嘅廣東話入面，到底「靜靜雞靜啲，定靜雞雞靜啲」，「啲啲少啲，定啲dur少啲」，「肥嘟嘟肥啲，定肥騰騰肥啲」等高深問題。
 

Ben Sir和6號討論的當然唔會漏咗粗口中的「五大將軍」，兩人仲創作咗辦公室版的《難為正邪定分界》，香港的打工佢怨氣咁重，帶幾個將軍返工在所難免，加幾個助語詞，成首歌即刻有氣勢好多。

下一位登場的學生是林頴彤(Bella)，女仔人家大膽向Ben Sir請教風月電影，Ben Sir笑言拍節目時有好多貨：「但畀大台ban晒，好在開騷先出得返。」Ben Sir教路一個字就可以令正經戲名變風月戲名，譬如《愛．回家之開心女速遞》，《食女平D》，《三少女．爺的劍》。

Ben Sir到尾段話今晚要幫自己囝囝辦個喪事，原來囝囝是指之前出的書《粗口學堂》被包膠。他坦言書籍不通過審批有三個原因：「50頁多過30頁講粗口，冇學術價值，同令人聯想粗口。咁我本書講粗口㗎嘛，得3頁講粗口會違反商品說明條例，第二我本圖畫書唔通都要學術？最後一點聯想係腦袋嘅事，咁唔通人哋腦袋我都要管埋？啫係地底都要管埋?」

Ben Sir直言後來在書局搵到兩本講英文粗口的書：「佢哋冇包膠，代表佢有學術價值，我買畀我個仔，希望佢來世做本Abc(Anything But Cantonese)書。」完騷訪問時，Ben Sir表示整個騷都好滿意，意想不到觀眾投入得好快，講到尾聲時在台上搵老婆的蹤影，他表示：「老婆將自己嘅靚位飛讓咗畀人，所以唔知佢坐邊。」問到是否好介意新書要包膠，所以一而再再而三提起？他直言：「唔係，又唔係完全唔畀人睇，係想解釋返啫。」