港人日本夾公仔輸12萬Yen　日本通翟威廉：最盡玩2千Yen好走人

去日本遊行，真係冇乜邊個冇玩過夾公仔機，而且日本店員仲相當友善，若然見你多次失敗，就會專登打開部機郁郁啲公仔擺位，讓大家不會空手而回。但近日有遊客到大阪旅行，就在名勝心齋橋的一間夾公仔店中伏，花了12萬Yen(8,400港元)一個公仔都夾不到，該名遊客將中招經歷post上網，竟然有不少網民有相同經歷，而矛頭亦直指該間黑店。

其實夾不到公仔都是自己技術與運氣問題，為何會指對方是黑店呢？該名網民解釋原來他最初只是玩300 Yen的夾公仔機，而店員亦友善地為他們移動公仔位置，跟着遊說他們轉玩500 Yen一次的夾公仔機，當然機內的公仔亦是大Size，而且當場示範如何夾到，還給他們試玩，而他們兩三下手勢已經夾到公仔，亦因為一時貪念令他們紛紛入局，原來到正式用錢玩時，又是失敗收場，跟着店員再下一城，叫他們玩1000 Yen的公仔機，而獎品不但有公仔，還額外有iPad及iWatch，而且又再一次讓他們試玩，最後12萬Yen玩晒，莫說iPad，連一隻公仔都夾不到，比起遊日的機票及酒店還要貴，難怪該名網民肉赤，兼且憤憤不平。

網民誤入日本夾公仔機黑店全文：

無綫藝人翟威廉曾在日本留學，精通日語及當地文化，名副其實是日本通，他接受《香港01》訪問，知悉該名網民慘況，不禁說「原來依家有iPad夾咁犀利？咁員工好努力等你挾到公仔呢？呢個係真嘅。我以前係日本留學時，都有夾毛公仔嘅，佢哋見你夾唔到就會移一移位，其實都係想你夾到，呢個係我嘅印象。以前我係池袋住都有夾，純粹開心玩下，我仲記得嗰時冇乜難度。」

問到他如何分辨那一間是黑店，他表示入到去一玩就知，「有額外嘅獎品，呢種形式真係未見過，咁梗係有啲嘢啦，唔好繼續玩啦。如果你堅持玩落去，玩得就預咗啦，十幾萬Yen都唔停喎，講真5千Yen都要停啦，3百幾蚊啦，呢啲紀律嚟嘅，要自己控制啦。」他還自信爆棚地說「我就一定唔會中招，夾兩嘢唔得都走啦，同女友去都係咁話。(最多試過用幾錢夾公仔？)我最盡兩千Yen。呢啲其實同賭場一樣，氹你去玩買大細咁，最後輸輸輸，輸到甩褲。同一道理，但有時又唔賴得人，佢又冇用刀行住你去玩。」最後翟威廉笑說去日本大把節目，不一定花盡金錢去夾公仔，弄得一肚氣就無謂啦。