【每逢大事說故事】Hehe浸溫泉 安倍想要北方四島 村民又點諗？
踏入十二月，又到誰騎着鹿車飛過的日子。天寒地凍，塵世間最爽既事莫過於與愛人浸住溫存……sorry係溫泉，肉帛相見，卿卿我我，而且！你並不需要首先有一個女朋友！就如安倍與普京，兩個麻甩佬，一泡熱水，眼裏只有彼此。
今次兩國元首面談，唔單止肉帛相見，安倍仲帶埋人返鄉下，喺山口縣溫泉旅館大谷山莊度過溫馨夜，又準備一堆經濟合作條約。講金又講心，家下仲拋晒個身出黎，到底安倍有咩要求？出發之前，安倍講到明想講北方四島問題，普京就講到明無得傾。北方四島，我細細個就聽過呢個名，但到底係咩東東？
北島定南島 呢啲都係相對嘅
呢個問題問得真係好，飛雲都好樂意解答你呢個問題啊喵！話明北方，都真係北過北海道；話明四島，就係國後、擇捉、齒舞、色丹四個島。但學愛恩斯坦話齋，呢啲都係相對嘅：對日本嚟講就話北，對俄羅斯嚟講就相當南，所以人哋就叫果邊做南千島群島。
在水中央 地大人少魚多
呢四個島，又北又南又在水中央，一年300日都落雨落雪。四個島入面，最多人果個擇捉島都係得8000人，而且大多數屬俄羅斯人。缺資源缺電，航班船運都乏乏，簡直好似柯南果啲與世隔絕嘅兇案現場。都不特止，醫院又少，又無大學，反而魚就特別多，所以居民平日就捕吓魚，放下牛羊咁。
資源豐富 位於要道
但千祈唔好睇少呢啲天然資源，四島漁獲豐富，專家估計年水産品達200萬噸；地底又有石油、黃金、白銀。而且地段仲好優越，水深港闊，係俄羅斯向太平洋嘅重要出口。想當年偷襲珍珠港，日軍就係喺擇捉島集結部署。而家北方四島由俄羅斯管，對佢哋嚟講，又真係幾正嘅。之但係，你鍾意姐，啲村民係咪咁諗，你哋有無問過！
傷害民族感情 呢啲好大鑊
話說北方四島近日本，居民着嘅用嘅都係日本貨多，街上面行嘅都係日本車，但居民就唔多想「回歸」日本喎，或者都同島上俄羅斯人多有關啦。飛雲才疏學淺係無問過村民，但《經濟學人》就問過俄羅斯人，發現78%都反對「割讓」北方四島。咁呢啲土地問題，好多時都係尊嚴問題嚟嘅。俄國人覺得，北方四島係俄羅斯二戰勝利象徵。你知啦，一講到傷害民族感情呢啲嘢，就好難有計傾，所以咪搞成咁囉。
近兩萬同鄉流落北海道
島民就咁睇，日本人又點睇？德野宏（音譯）今年82歲，同1萬7000個北方四島同鄉一齊流落北海道，成日都想返鄉下。想當年1945年9月1日，蘇聯軍登陸色丹島，果時島上面仲有唔少日本人，德野宏係其中之一。「我以為我哋會死啊！」但德野宏唔單止無死到，仲學埋俄文，但就畀俄羅斯人送返日本，一去無回頭。
劇透警告：下面條片有女睇
老人家就當然想落葉歸根，但除此之外而家日本右翼團體都好想收返北方四島，日本政府亦設有北方對策部，而且定每年2月7日為北方領土日，亦會有啲廣告講吓日本同北方四島點血濃於水咁。有無人理呢，飛雲就唔知喇。
得兩個鏡頭我都知你好失望，但唔緊要架我唔mind。
來簡約地爭多70年 態度未曾改變
兩國爭奪呢幾個島仔都爭咗好耐，最遠講緊十七世紀就開始爭。爭爭吓到十九世紀，兩國簽咗《下田條約》，正式將四島歸入日本所有。本來四島上面都住咗萬幾個日本人，點知到二戰果時，美國英國拎住北方四島當餅仔，諗住分畀蘇聯氹佢入局，一齊打日本。The rest is history，日本輸咗，蘇聯就袋左四個島。
我要嘅係4條A！
話說蘇聯都唔係無話過畀返啲島日本，但呢4個島，就好似苗僑偉果4條A，對日本嚟講無咗兩條都唔得。本來兩國由戰後一直傾到1956年，當年大家都同意先交回齒舞和色丹，但蘇聯話國後和擇捉唔需要還。咁日本就唔制啦，大佬我四條都畀你搞到變無料，留對啤喺度算係點。所以日本同俄羅斯到而家都未簽戰後和平條約。
無限期免息分期都無得傾
4條A嘅問題，一直留到依家。2000年普京啱啱上任總統，同日本傾，日本依然堅持「先還一半，其餘分期」嘅原則，雖然話放寬到無限期免息分期，但俄羅斯依然回絕。
同普京沖涼 為戰鬥民族送上柔情
百世修得同船渡，千世修來共枕眠，但70年就修來同沖涼——都唔知係積福定作業。時至今日，兩個麻甩佬一齊沖吓涼浸吓浴，唔知會唔會擦吓背，為戰鬥民族送上柔情暖意，普京入旅館前嘅說法係「希望唔好搞到咁攰」，嗯……飛雲都唔想諗太多。但如果有人講起，十二月真係難過嘅月份，請你諗住同普京沖涼，就會發現，其實一個人都無咩可怕姐。