Sport Pants襯Dad Shoes好鬼悶？ 斗零踭先至係王道

多得街頭時裝風持續熾熱，今年一系列闊Cut運動褲，已然升格為以一打百、萬世跟風的定番Item，意牌Palm Angels和日牌Doublet.更是靠這類Sport Pants而光速上位！然而興時興，大家又有否想過Sport Pants究竟應配襯咩鞋款才入型入格呢？

大多數人應該都二話不說地答Dad Shoes，的確如此配襯，在視覺上來講是沒有得輸，但假如星期一至日都係Dad shoes的話，就算人家唔悶你自己也覺無新意吧？不過沉醉於Sport Pants的各位亦不用煩惱，出位的時裝新人王Christelle Kocher自上年開始已然為運動闊褲找來了另一位真命天子，就是估你唔到的斗零踭高跟鞋。

或許尚有人覺得斯文高跟鞋，配搭街頭味濃的運動褲有點風牛馬不相及，但實情KOCHÉ正是靠九唔搭八來起家。今個SS18季度與Nike和巴黎聖日耳門足球會合作的一系列變種球衣，已叫睇波衫唔起的Hi Fashion友另眼相看，但最叫人由衷佩服的，還是她開創了Stiletto heel與Sport Pant之間的無限可能性，雖然不見得是她個人發明這種配搭術，但設計師自上年開始就透過Runway Show、Ad Campaigns、IG snapshot照等，一系列鋪天蓋地的宣揚，為「運動闊褲襯斗零踭」這美學概念提出有力證明，Christelle Kocher實在是居功至偉。

高跟鞋款未必需要誇張搶眼（只要夠高就是了），反而褲款方面就不妨矚目一點，顏色上可以大紫大紅；細節上亦不妨點綴些刺繡元素；至於褲管方面更有愈來愈長的傾向，外國就有很多Fashionista以「長到拖地」的形式招搖過市，假若財力同心力上承受得起的話，其實也可一試。