玩轉腦朋友2|姜濤被指同阿尷撞樣應該去配音 自貼對比圖5字回應
撰文:金秀玲
出版:更新:
姜濤人紅是非多,不時都遭受負評,但早前他就連番放棄偶像包袱,更試過將「黑圖」轉做自己社交平台的頭像,跟Haters笑埋一份,獲讚高EQ及好大方,連內地網民都直言對他的幽默感另眼相看!
上月他在演唱會尾場前再發功,自貼在直升機上的超肥仔黑圖,完全冇頸,脹爆如一個波。姜濤自嘲「巔峰肥」,更表示:「偶包,早就沒了,想通了。」另一位相中人邱士縉(Stanley)都有留言,說:「我咁努力保護你,做咩自爆😂😂」、Jeremy亦說:「痴線😂😂😂 冇諗過係你自己po出黎」
近日電影《玩轉腦朋友2》在各地開始上映,雖然香港未上,但已從各個劇透渠道得知戲中的角色,其中由魏浚笙Jeffrey聲演的阿尷,全程笠住有帽衛衣,被指神似姜濤這個著住衛衣的「巔峰肥」造型,更有另一張相,阿尷索緊外套遮住自己,而姜濤都曾做過這個動作,難怪不少人都問:「點解唔搵姜濤配音?」、「姜濤完全係真人版」。
而今日(27日)姜濤就索性自貼兩張對比圖,分別在IG和Threads出Post,他在Threads說:「唔好再send畀我啦…」又再IG說:「一點都不像」,結果隊友Jeremy和眾Fans卻留言指「好似!」他之後又在IG Story貼出更多對比圖和惡搞圖,完全不介意同阿尷撞樣。