元朗車輾貓｜村民驚見貓屍　翻睇天眼揭發及報警　怒稱：好難接受

今日（13日）網上瘋傳私家車兩度輾貓的恐怖「天眼」片段，引起公憤。據了解，事發地點為元朗一村落對開，《香港01》尋獲首先發現貓屍的男村民了解，他由於經常餵飼流浪貓，第一眼便認得慘死貓隻為「波尾」，事後通知動物組織「毛孩關愛組」協助善後，同時親往警署報案，怒斥：「好難接受‥‥‥仲要走咗去，仲要碌多次，真係好兒戲！」

該名男村民透露，不時會餵飼在住所附近出沒的流浪貓，今次命喪的貓貓於過去大半年出現，他為其起名「波尾」，詎料牠會慘死輪下。據悉，波尾因有患病，愛協不時會派員捉拿處理，而今次案發前亦曾有愛協人員到場，惟波尾成功逃脫。直至昨日（12日）早上7時許，他外出上班時驚見貓屍，翻看閉路電視片段後，才赫見波尾於凌晨被車輾死。

該村民大感不捨，立即檢起貓屍，並向毛孩關愛組求助。及至今早（13日）7時半，他亦親身前往元朗警署報案。他對事件感到十分難過，「真係好難接受！傷害動物本身已經大鑊，仲要走咗去，仲要碌多次，真係好兒戲！」他又指，過往已曾發生同類事故，促請警方加強執法及修例，以儆效尤。

毛孩關愛組負責人文哥表示，「（貓貓）個頭輾到爆晒！」經初步判斷後，死亡貓隻為成年雌性唐貓，相信為流浪貓，如最終無人認領，會為貓貓安排火化。但現時不會即時處理，以便警方蒐證或有進一步行動。

▼ 元朗平治兩度輾貓天眼片段 ▼

網上流傳的兩段影片共長約2分鐘，可見一隻貓躺臥一條馬路休息，其後被一輛平治私家車輾過，男司機及乘客先後落車，其中男司機彎身查看貓咪後，兩人即施然返回車上，其後掉頭原路駛走時，竟再一次輾過貓咪，絕塵而去。片段惹來網民撻伐，認為必須報警，怒斥「天怒人怨」、「極度殘忍」，「唔可以放過呢啲人渣」 、「一定要判刑」。