【足球．博評】日本外流球星集體失勢
曾幾何時，日本外流球員唔止多，而且表現仲相當唔錯，有啲仲企穩球會正選，無論喺數量及質量上都一時無兩，堪稱亞洲之光。
不過自從2014年世盃後，無論人數同表現，日本球員喺外流方面都有啲停滯不前，雖然偶有閃光，但整體已比過往遜色不少。
洛迪高就帶大家睇下近來部份日本外流球星遭遇同佢哋有咁嘅遭遇嘅因由！
文：洛迪高@世界波
乏上陣機會
講起日本外流球星，其中兩位大牌當然就係本田圭佑及香川真司！曾經風光嘅佢哋，而家喺球會都極度缺乏上陣機會。
本田：意甲迷思
日本除咗特別鍾意師從嘅巴西外，由漫畫包括《足球小將》嘅小志強同葵新伍、《足球風雲》嘅神谷篤司到《球場幻想曲》嘅坂本轍平都對意大利足球有一種情意結。本田決定由俄羅斯嘅莫斯科中央陸軍加盟當時仍處動盪嘅AC米蘭，都係因為件「意甲豪門10號波衫」。不過由加盟開始，本田上陣機會都唔算太多，有出色表現嘅場次更係鳳毛麟角。本田喺場上嘅表現到而家都係未完全融入，本身速度較慢嘅本田更不入現今主打青春風暴嘅主帥蒙迪拿（Vincenzo Montella）嘅法眼。
香川：一失足成千古恨
香川失足，在於當日選擇加盟曼聯。喺第一次效力多蒙特時嘅香川喺高普（Jurgen Klopp）手下近乎係必然正選，而且喺大戰中（尤其是同史浩克04嘅蓋爾森基興打吡）表現相當出彩。可惜去到曼聯後，喺費Sir（Sir Alex Ferguson）治下雖有上陣機會但未有隊友配合（始終香川喺多蒙特踢得咁出色都係因為同隊友配合得當），到莫耶斯（David Moyes）時期更被投閒置散，及後選擇「愛回家」，但可能喺英格蘭雪得耐，回家後嘅香川雖然處於踢法差唔多嘅多仔，但表現已無咁Sharp，如今喺新教練杜慈（Thomas Tuchel）旗下同樣缺乏上陣機會，加上新星迪比利（Ousmane Dembele）崛起，似乎佢今季條路都好難行……
長友：換帥累事
長友佑都最近向女友求婚成功，但似乎為佢球會生涯起唔到咩沖喜作用。本來喺國米有穩定出場機會嘅佢，最近因為傷患以及國米呢季換帥而失去位置。暫時國米左閘首兩名人選係安沙迪（Cristian Ansaldi）及迪岩布斯奧（Danilo D’Ambrosio），長友唔通要轉踢右閘先有路行？
仍有機會
雖然流洋前輩喺豪門都遭遇樽頂，但其實日本仲有唔少留洋將仲有佢哋空間嘅。
兩個酒井：右邊一片天
兩位酒井分別就係效力德甲漢堡，日德混血兒酒井高德以及效力法甲馬賽嘅酒井宏樹。漢堡季初表現低沉，換帥後順便換埋隊長，由酒井高德出任，及後漢堡成績逐漸回升。至於宏樹，由降班嘅漢諾威加盟馬賽，仲有穩定出場機會！
日本鋒群：勤力搭救
數下意甲嘅日本前鋒有幾多﹖有效力緬恩斯嘅武藤嘉紀、哈化柏林嘅原口元氣以及科隆嘅大迫勇也。雖然原口同大迫入波唔多（本季德甲入波：原口：1；大迫：4），但因為夠晒勤力，都可拼得一席之位，其中大迫雖然畀拍檔莫斯坦迪搶晒風頭，但早前試過大演帽子戲法入圍一週最佳陣容！至於武藤把握力及前鋒觸覺更好，上季都入到7球，但今季由於受傷患困擾暫時上陣7場入2球，而且球隊又啱啱借入保贊，但仲後生嘅武藤只要保持身體健康就一定有機會！
就算強如香川真司同本田圭佑，喺效力曼聯同AC米蘭其間都有一段失意時期。反而一直效力小球會嘅乾貴士留歐期間就一直都係所屬球會嘅主力。踢過德國球隊波琴、法蘭克福，而家效力西甲球會伊巴嘅乾貴士上季加盟就曾經射入過世界波，協助伊巴2：1擊敗愛斯賓奴，嚟到今季上陣15場攻入2球，仲要全部都係以正選身份出場，算係留歐球員之中上陣機會最穩定。
平穩向上：中後場大將
中場大將長谷部誠喺德甲發展一直相當平穩，自從紐倫堡降班後轉投法蘭克福，表現平穩之餘仲不時有驚喜，表現平均嚟講仲好過早幾年，今季入咗球波嘅佢仲同球隊一齊為晉身歐洲賽努力，歐聯都不是夢呀(現時排第5)！
至於現時效力英超修咸頓嘅中堅吉田麻也，雖然曾經有段時間無咩出場，但近來都機會踢右閘有番啲穩定出場時間，隨住前隊長方迪離隊，加上荷蘭中堅雲迪克受傷，令修頓後防突然人手短缺，要簽番烏拉圭後防卡沙利斯頂檔，只要吉田表現穩定，隨時可利用呢次機會上位做穩定中堅正選！
面臨困境
雖然前面提過唔少日本攻擊球員都仲有空間，但另有一班就面對困難境況……
際遇各異：淺野拓磨、岡崎慎司、夏雲拿、柴崎岳
雖然加盟英超勁旅阿仙奴，但可能連雲加自己都未必記得起淺野拓磨，喺之後嘅訪問之中機乎無提起過佢咁濟。而更無奈係，當「教授」口中再次出現呢位新晉日本國腳嘅時候，就係宣佈淺野嘅工作證申請失敗，今季都唔可以為球隊上陣…最後淺野被外借去到德乙嘅史特加，暫時聯賽上陣10場攻入2球，都算係唔錯嘅成績。不過我相信佢本人以至日本國民都係希望盡早回歸英倫戰場……
上季協助李斯特城上演童話故事，成功勇奪英超嘅岡崎慎司，今季喺英超都有18次出場攻入3球，對於一向唔算高入球率嘅佢嚟講已經算係有所交代。球隊今季簽入咗阿爾及利亞前鋒施利文尼，加上屬於必然正選嘅華迪，岡崎面對嘅競爭可能比上年更大。當然近日傳出烏路亞同球會鬧翻，球隊又喺歐聯成功出線，岡崎不惜氣力，防守型前鋒嘅特點仍然係球隊必須，不過首要都係英超入多幾球幫球隊護級先啦……
至於日本荷蘭混血兒夏雲拿，已經回歸荷甲，而家效力緊海牙，今季上陣17場攻入3球，除咗因傷而有一段時間缺陣之外，其餘時間都係球會主力。但係翻本紀錄，自從佢8月入過波之後，都未再取得過入球…而佢偏向中鋒嘅踢法，又似乎唔太受國家隊歡迎，將來都底是好是壞都係難以預料……
至於近來日本旅歐最受人期待當然係柴崎岳，世界冠軍球會盃對皇家馬德里大放異彩嘅佢，雖然只係轉投西乙特內里費，但壓力較細可能更易發揮，但近來傳出柴崎對於西班牙出現極端不適應，瘦咗好多之餘仲有時無練波，令佢嘅留歐前景突然一片灰暗……
至於曾經效力拜仁慕尼黑但敗走日本，現時重返德甲效力奧格斯堡嘅宇佐美貴史，仍然無咩機會，要知道喺球隊入面，前鋒球員多達9位…真係有排未到佢，隨時又要返日本……
敗走歐陸
等待機會：清武宏嗣、柿谷曜一郎、山口螢
來屆嘅日職，大阪櫻花相信會係其中一隊被受注目嘅球隊。因為隊中坐擁住三位有旅歐經驗嘅球員，分別係之前效力西維爾嘅清武宏嗣、瑞士球隊巴素爾嘅柿谷曜一郎、同埋德甲漢諾威嘅山口螢。
當中以曾經喺德甲企穩陣腳，近日天價回流嘅清武宏嗣最受注目，轉會費盛傳高達600萬歐圓。雖然喺西甲首次上陣就有入球，但係之後就因為語言問題而得唔到上陣機會，半季之內只曾4次出場，加上球隊又簽入咗需要用到非歐盟名額嘅阿根庭中場禾達‧蒙度耶 (Walter Montoya)，為咗鞏固自己2018年世界杯出戰機會，清武放下身段選擇回流亦無可厚非。希望選擇咗4+6=10嘅46號球衣嘅清武，可以係日職搵返自己嘅一片天，出戰到來屆世界杯。
至於山口螢，15-16年球季冬天加盟德甲球隊漢諾威，但就係國家隊比賽令鼻骨骨折，令山口螢喺只係踢咗6場德甲比賽嘅情況之下就已經回流日本；而效力瑞士球隊巴素爾嘅柿谷曜一郎，首季上陣14場入3球成績不俗，但到咗第二季情況就急轉直下，只係曾經出場4次攻入1球，最後亦都回流加盟母會大阪櫻花。
其實回流無分對與錯，不過眼見山口同柿谷都甘心「屈就」喺J2嘅大阪櫻花 (係…飲水思源好重要…報恩好重要…) 但係又點解唔選擇競爭更大嘅球隊？見到J2附加賽，踢防中嘅山口螢都踢到有單刀攻門……
隨住各國聯賽都充斥住激烈嘅外援競爭，對於先天優勢並唔明顯嘅日本球員，佢哋喺有啲位置上都要靠努力先可以成為球隊嘅角色球員，而呢一個亦係佢哋大部份擁有嘅優勢。本田香川唔係成日有，外流亦誚際遇同運氣，嚟緊日子入面，日本球員如想外流，自選擇同自己準備係最重要。呢一方面，似乎唔洗太擔心日本球員。雖然最近面對樽頸，但洛迪高期待有更多日本球員可以喺外地發光發熱！
（文章純屬作者意見，不代表香港01立場。）