鄧加、莫耶斯…那些足球界的一男子

香港人有咩習性？其中一個係睇人「PK」最開心。想知道自己幾唔受歡迎，只要睇下自己落難嘅時候有幾多人拍手掌同落井下石就知道。
同理，作為政府機關領導人、老闆、上司，如果真係好唔受歡迎，唔止個個想你走，喺你離開嗰陣仲會即刻開香檳慶祝加埋請小鳳姐出嚟，就知道自己幾乞人憎。
至於你會唔會檢討自己已經唔緊要，因為大家只想睇你消失喺佢哋眼前。

文：洛迪高＠世界波

其實喺足球界都係一樣，而大部分「公敵」，自不然就係做「領導人」嘅領隊、教練或者管理層啦！所以不幸做咗不受歡迎嘅一男子都唔怕，因為足球界都仲有其他一男子。

 鄧加（Dunga）

洛迪高第一個諗起嘅就係鄧加，因為兩次帶領巴西國家隊嘅佢，其實由執掌一刻同落台時候，都被視為「錯誤的一個」。

鄧加嘅第一次執教，以威望嚟講無得彈，但佢本身踢防守中場，已令球迷擔心巴西會無咗森巴味（雖然本來已經開始減少），而之後森巴軍團亦確係更加向歐陸風格靠攏，變得更實際，但成績算過得去。最終離職嘅導火線係2010年世界盃以1：2反敗荷蘭，令球迷更順理成章要求佢離開。

鄧加第二次執巴西隊帥印時，引起嘅不滿就更大，除咗因為第一次執教時嘅經歷，以及當時巴西隊無論比賽場面及成績都相當平庸，仲因為喺國內執教國際體育會嘅鄧加並無突出成績——大家心中嘅熱門其實係現任領隊泰迪（Tite）。

果然，喺二度進宮初期，雖然成績唔錯仲贏過一啲勁旅，但其後於2015年嘅美洲盃分組賽出線得毫無霸氣，更於淘汰賽第一輪就以互射12碼不敵巴拉圭，只係鄧加決定賴死唔走。到翌年百年美洲盃，巴西僅能在對弱旅海地時取勝，更於最後一輪只要和波即能出線下，以1：0爭議性地輸畀秘魯（秘魯入球有手球之嫌），令巴西自1987年後第一次無法晉身淘汰賽，而今次失利，亦成為壓垮鄧加嘅最後一根稻草。

 莫耶斯（David Moyes）

另一位廣泛遭反對嘅係前曼聯莫耶斯。「耶子是無辜的」呢番說話，更多係非曼聯用嚟調侃曼迷嘅用句。由一開始，曼聯球迷已經對莫耶斯能否駕馭曼聯半信半疑，皆因莫耶斯執教嘅愛華頓長期處於中游，而且踢法亦頗英式，令球迷擔心莫耶斯未能控制球會內的巨星級人馬，更會影響曼聯踢法變得英式。縱使莫耶斯乃費格遜爵士親自欽點，但費爵爺嘅眼光並非永遠是對的。

隨後另一句網絡戲言「9981斬」亦證實曼迷擔憂非虛，曼聯其後成績不佳之餘，場面亦難看，往往只靠兩邊「燒味」（即傳中「斬波」）博取入球，而雖然1月購入技術球員馬達（Juan Mata），但未能好好運用，同時如香川真司等技術性球員亦難以發揮。而在歐聯賽場，曼聯雖曾在十六強主場上演驚天反擊反勝奧林比亞高斯，但之後負拜仁出局，令曼聯管理層失去耐性。

 想佢走嘅　除咗領隊仲有老細 

貝盧斯科尼私生活糜爛，以及近年因無力為球會於轉會市場作大手投資，而要以各種手段收購或借用球員，且成績未有起色，都令球迷們希望貝盧斯科尼能盡快放手，與球會分手。雖然其後有關方面宣布交易完成，但由於收購方過於神秘及因故而令交易遲遲未能完成（延伸閱讀：【中資收購AC米蘭延至明年3月　另要增資逾8億】），更令球迷難以對貝老及收購嘅中資集團安心，或許如果有咩意外，A米球迷反嘅，會係新老細。

有人都覺得轉新領導層或教練，是福是禍都未知，唔好咁快開心住，但如果對方真係太乞人憎，只要嗰個人離開就已經足夠開心，足夠約朋友同伴食餐飯慶祝，又何樂而不為？未來嘅事第日先擔心啦，起碼而家有一抹正能量。祝願香港真係明天會更好！

（文章純屬作者意見，不代表香港01立場。）