【意甲．博評】三雄鬥爭　今年會唔會到拿玻里出頭？

文：洛迪高@世界波

近年意甲被老婦人祖雲達斯壟斷，而背後總有幾位熟悉嘅對手，包括羅馬以及拿玻里，或者今年可以加上換上史巴列堤（Luciano Spalletti）執教嘅國際米蘭，但真正令人驚喜嘅，就似乎係年年都有啲機會，但功虧一簣嘅拿玻里（Società Sportiva Calcio Napoli）！

拿玻里喺教頭薩里（Maurizio Sarri）帶領下，年年總有機會望下榜首，但開季八戰全勝嘅佢哋，今年似乎真係有機會，而無需再望盃輕嘆，而成績暫時仍算不俗嘅佢哋，仲大踢漂亮足球贏埋口碑！

中場大師與快打旋風

講起拿玻里，大家必然記得當年一手帶領球會登頂意甲嘅馬勒當拿（Diego Maradona），以至日後只要有前場攻擊球員橫空出世，新朵定必係新馬勒當拿，就連踢法同球王大相徑庭嘅咸錫（Marek Hamsik）都孭過呢個朵。而如今陣中，有兩位球員踢法更似阿根廷球王，就係梅頓斯（Dries Mertens）及恩斯治尼（Lorenzo Insigne）。兩位球員身材矮小又擅於盤扭，創造能力及入球能力俱備，其中前者在加盟時經過一段適應期後就入球能力大爆發，加上無球走動能力甚強嘅皇馬舊將荷西卡利莊（Jose Callejon），令球會往往於快速反擊可以用速度拖垮敵人，亦能於陣地戰中利用個別球員個人技術撕破對手防線，以創作機會或直接埋門。

一味打快，仲點樣可以維持效率呢？拿玻里亦能夠好好控制中場，幕後功臣就係艾倫（Allan）與及佐真奴（Jorginho）！截至10月16日，佐真奴於意甲場均傳球達101.3次，超過第二位嘅基亞連尼（Giorgio Chiellni）達20次之多，傳球成功率亦達92.3%。而艾倫嘅活力亦有助佐真奴掌控中場節奏。

根據外國網站WhoScored.com所敍，拿玻里截至10月21日，佢哋嘅控球率（60.2%）、傳球成功率（89.5% ）、入球數（26）及場均射門（19.4）都係冠絕意甲，而佢哋嘅場均短傳同樣第一，達到685球，大幅領先祖雲達斯嘅562球，大家都可從中睇到拿玻里嘅足球風格。

祖記弱化

無可否認，拿玻里衝冠背後，有住祖記弱化嘅原因。祖記人腳並無咩大變，而喺失去中堅邦路斯（Leonardo Bonucci）後，後防主力如保方（Gianluigi Buffon）又老一歲，而魯加尼（Daniele Rugani）又尚未成熟，都為防線帶來缺口，而進攻端引入杜格拉斯哥斯達（Douglas Costa）以及貝拿迪斯基（Federico Bernardeschi），兩者都暫未展示踢前球會前嘅驚艷表現，加上打法漸被睇通以及專心歐聯，祖記老化就為意甲群雄，帶來一絲曙光。

小心歐聯

如果話想喺歐聯登頂係祖記首要目標，咁拿玻里係歐聯同意甲嘅取捨，就足以影響佢喺本土聯賽能夠堅持幾耐。誠然，拿玻里後備陣容，尤其是中場厚度尚算足夠，打意甲應該都應付到唔少下游對手，問題就係前場攻擊主力如恩斯治尼，咸錫，梅頓斯甚至荷西卡利祖都不可或缺，而喺前鋒馬歷克（Arkadiusz Milik）重傷後，萬一喺雙線作戰中佢哋任何一個有咩冬瓜豆腐，或征戰太瀕威力漸減，對拿玻里嚟講絕對得不嘗失，筆者相信聰明人薩里將好快對歐聯作策略性放棄，反正奪冠機會甚低以及祖記弱化機會難得，此時不爭意甲更待何時！

薩里之腳踏實地

至於領隊薩里自執教拿玻里後，球會成績一直相當穩定，縱然今季好有希望，但佢依然腳踏實力，唔敢太早定下好高目標，一場一場踢好比賽，咁樣都可以幫助球隊可以好似前季英超嘅李斯特成咁製造驚喜！不過唔好睇少佢膽識，因為正正係佢將梅頓斯放落中鋒位置，令佢大爆發！

（本文純屬作者意見，不代表香港01立場。）