【渣馬．博評】跑友飯局　論盡渣打馬拉松

老林和肥強是數年前，在東京馬拉松比賽時認識的跑友，大家均跑了渣馬數年，每年渣馬前夕都會相約飯聚，吹下水交換心得。

肥強：「你初馬好似係跑渣打馬拉松咖喎！」

我：「係09年嘅渣打吉隆坡馬拉松，唔係香港渣馬，嗰次跑完有 Finisher medal，同埋有件 Finisher Tee 送咖，嗰時港馬都未有完成牌送。」

肥強：「吓，乜仲有 Finisher Tee 送架，正喎！」

我：「渣打新加坡馬拉松都係除咗完成獎牌之外，亦都有 Finisher Tee 咖！呢啲係對跑手嘅鼓勵同肯定嚟加嘛！」

老林：「其實香港渣馬都可以話係渣馬系列嘅老大哥，但係啲後輩都好似搞得有心過佢！」

肥強：「而家大多數跑手，都經常出埠周圍跑比賽，見過大場面，返到嚟香港實會有比較，乜嘢係國際大賽加嘛，人哋搞比賽就以跑手為本，港馬就以自己運作方便為本，真係覺得佢哋唔長進！」

老林：「我覺得主辦嘅態度，有啲似政府機構咁，少做少錯，唔做唔錯，以往搞開順順利利無風無浪，就唔好變囉！」

我：「真係唔多滿意香港渣馬嗰種十年如一日，搞咗就算嘅態度！」

肥強：「我認為渣馬只要佢哋唔好下下好似啲上市公司咁，一味顧著造大盤數，成日標榜有7萬幾人參加，重量不重質，多啲喺跑手用家角度去改善，佢哋有政府咁大嘅Backup同豐厚嘅資源，係絕對可以做得好啲嘅！」

我：「有7萬幾人參加，就唔代表係優質賽事嘅，神級波士頓馬拉松，都係得3萬幾人參加之嘛！」

我：「我係香港人始終都係撑香港場嘅，只係恨鐵不成鋼啫，嗰陣時港馬肯改革，全馬加設完成牌時，我第一時間參加，東京馬拉松都唔去，以示支持！」

老林：「其實呢幾年，渣馬都肯改變，明顯有改善咗！」

我：「呢兩年見佢都會改吓賽道，同埋今年件 Event Tee 好過以前好多，起碼我都想有一件，明顯有進步，我無跑兩屆，出年都諗住落番場玩，我真係好想香港能夠好似東京、大阪咁，有個豎起隻手指公嘅馬拉松咖！」

老林：「其實我哋都要畀啲耐性，進度慢唔緊要，肯改善就始終有日達標嘅，長跑長有吖嘛！飲杯！」

以上飯局內的所聽所聞，並不完全代表本人的全部意見，在此衷心希望港馬能從善如流，以人為本，成為香港跑手引以為傲的本土賽事！

（本文純屬作者意見，不代表香港01立場。所有相片由作者提供。）