中年好聲音2｜陳蒨葶懶理被網民人身攻擊：理得你鍾唔鍾意我
撰文：吳子生
出版：更新：
成功晉身10強參賽者陳蒨葶今日（27/2）現身將軍澳電視城出席無綫歌唱真人騷《中年好聲音2》宣傳造勢活動。一直被視為大熱門的鄭梓浩，竟大熱倒灶在10強止步，令不少網民戥他不值，茅頭直指陳蒨葶，狠批她唱功差，個子細無台型壓唔住場，竟然可以順利過關，令人甚表不滿。
陳蒨葶偶像是鄭秀文。（吳子生攝）
對於網民以上批評，陳蒨葶接受《香港01》訪問時表示：「無論係點，都一定有鍾意，亦有人唔鍾意。但我都會睇佢哋對我中肯嘅評語，我會接受，同埋我會檢討。（有冇被人身攻擊）咁呢樣就一定有，但我就冇乜理過，明白做呢行我哋係要面對受眾，但亦唔代表可以人身攻擊我哋，我覺得任意嘅人身攻擊係唔應該，我係唔會接受。但通常我係選擇唔理佢，反而我會好多謝佢哋，起碼因為我，佢哋先去討論我，我係開心嘅。最梗要係講我，我理得你鍾唔鍾意我，就等同於一套劇咁，做奸角，出到街都畀人鬧嘅，咁就即係成功啦。咁所以我就係呢種心態去面對所有對我嘅攻擊。」
陳蒨葶今日出席《中年好聲音2》宣傳活動。（吳子生攝）