薛影儀被公司終止合約成失業大軍 前經理人林寶玉認兩人冇偈傾
撰文：吳子生
出版：更新：
被封為「亞視一姐」的薛影儀，早前疑與經理人林寶玉鬧翻，被公司終止合約，雖然薛影儀失業，但仍有亮相其他網上頻道做直播，更暗示想加入無綫拍劇。
林寶玉獲頒傑出企業家獎。（劉智源攝）
今晚（2/11）林寶玉現身旺角出席企業品牌頒獎禮時，她接受《香港01》訪問時表示：「失業，又唔好咁講，佢只係待業，可能佢有嘢做，又唔好咁講佢失業。（薛影儀有冇搵你求救道歉認錯？）都冇，而家都少聯絡，我諗一開始嘅時候，離開公司都仲有一兩句。（同薛影儀劃清界線！）又唔係話劃清界線，我哋又唔係敵人，佢有佢自己嘅生活，佢自己開心咪得囉，因為我都有自己嘅生活。（係咪放低咗佢？）已經放低咗啲，盡量都唔睇返以前太多嘅嘢。」