【射鵰英雄傳‧劇評】TVB出唔到一個李一桐？守舊、無膽、無突破

近年大陸爆紅的兩套劇集，《新射鵰英雄傳》和《三生三世十里桃花》，不約而同也有一個吸睛點，就係靚女。《新射鵰英雄傳》中，兩位女主角，飾演黃蓉的李一桐和飾演穆念慈的孟子義，都是九十後的新晉演員，分別二十六和二十一歲，但已經在劇集當中擔演女一和女二的角色。憑住青春和漂亮的面孔迅速走紅。另一個例子，在《三生三世十里桃花》擔當女二的迪麗熱巴也只有二十四歲，但已經在多部劇集中擔當女主角，女一的楊冪靚就唔使講喇，都只係三十歲。即使在韓國，早前大熱韓劇《大力女子都奉順》中的女主角朴寶英，雖然已經出道多年，但也只是二十六歲而已。

以為《新射鵰英雄傳》只係得兩位靚女？咁你又錯喇！做瑛姑的張楷依、梅超風的米露、傻姑的夏梓桐、韓小瑩的肖茵，全部都是不過三十的美女。當然，一套劇集走紅一定不只是靚女演員這個因素，劇本、場景、男演員、老戲骨等等也都是不可或缺的。不過無可否認，一位靚的女演員走出來一定會受人注目，尤其是年輕的女演員。一來青春的美是最令人難以抗拒，二來新鮮感也比年紀大的演員高，

講返TVB，要講靚女大家梗係第一時間諗起港姐。就由最近的一屆說起，最多人留意嘅冠軍馮盈盈，都係得《溏心風暴3》做女配角。再之前嘅麥明詩、邵珮詩，都係徘徊緊女配角呢個位置。陳凱琳、蔡思貝、朱千雪和黃心穎都已經擔當過女主角，不過演技就不停俾人批評，無辦法喇，其實呢一堆都係選港姐出嚟，多數都唔會係讀演戲出身，唔通一做咗港姐啲演技就咇出嚟咩？睇返大陸幾位女演員，李一桐畢業於北京舞蹈學院，孟子義就北京電影影院表演系，迪麗熱巴又係上海戲劇學院表演系，張楷依肖茵都係北京電影學院畢業，夏梓桐仲勁，中央戲劇學院，於美國南加州大學進修電影製作，以及英國Westminster大學進修戲劇表演專業。個個都係學院派出身，呢一班港姐被外界形容得最多就係「花瓶」，當然「花瓶」都有佢嘅用處，但講到演技喇喎？大家都要俾啲時間佢地浸淫吓，不過到時都唔知幾歲喇。

咁既然港姐好少出演戲出身嘅人，不如睇吓TVB嘅藝員訓練班喇？呢一班一定係演戲出身喇？不過要數返近年藝訓班出嚟而又擔正女主角嘅演員，其實係無。睇返最近都要去到08年嘅黃智雯，不過佢都要入TVB過咗幾年先有得做女二，成績算唔錯架喇。再望吓04年藝訓班出嚟嘅胡定欣，都要做足八年先叫做有個第三女主角做吓。要從藝訓班出嚟短時間就擔正做女主角基本上無可能，TVB一向作風就係要你浸吓先，唔敢大膽用新人，呢一種守舊的思想亦令到TVB無法突破。

TVB內部無，咁向外發掘又得唔得呢？例如香港演藝學院都係一個演員嘅搖籃，睇返近年喺演藝出嚟嘅女演員有龔嘉欣、朱晨麗、賴慰玲，呢三位都算係演技有一定的基礎，不過龔嘉欣入TVB後只係做一啲閒角配角，基本上都未上到主角位。朱晨麗就好啲，女二女三都做過唔少，不過就無緣女一，賴慰玲做咗幾年舞台劇先跳入電視圈，演技係上文當中算係最好嘅一個，可惜都已經三十歲。

你話TVB無後生女又靚又好演技咩？其實又未必，早前受到網民追捧的江嘉敏都算係一個比較出眾的演員，但你覺得TVB會一下子捧佢上女一咁大膽咩？答案係一定唔會囉。當TVB仲係要靠胡定欣、田蕊妮、黃翠如呢一眾花旦，甚至要搵返陳松伶、宣萱呢啲上一代花旦返嚟做女一。唔係話佢哋唔好戲呀，不過你又要買套《新射鵰英雄傳》返嚟，人哋個個都又靚又後生又有演技，咁咪有個對比囉！人哋《射鵰》當初用咗兩億拍，但就搵一堆內地唔紅嘅演員做，都俾人鬧到飛起，不過出到嚟嘅結果就有目共睹。點解人哋用成2億都敢去突破，你TVB拍啲低成本劇唔敢用新人？成日抱住一種唔變就唔會衰嘅心態，係，收視一直都會係咁上下嘅水平，咁咪無突破囉，呢個慣性收視嚟㗎咋，依家個個都睇韓劇、內地劇，點解？人地演員又靚又新又好戲，好過睇你呢個來來去去都係嗰堆人做主角嘅TVB啦。