經典巴倫紐戲院60蚊平盡新界　銀幕有裂痕係屯門友集體回億　

無論你係型男定毒男，講到追女仔的例牌行程，必定是「食飯睇戲直落」，但如果睇戲的過程已經出事，就肯定成晚要食白果，早點返歸大覺瞓。近日網上有巴打大呻睇《一念無明》時中伏，不過他指的不是套電影，而是間戲院出事，事緣這位巴打去了屯門至經典、至出名的「巴倫紐」戲院，單是提到熒幕上有裂痕，及聽到隔籬院的飛車聲，已經讓巴打有前所未有的睇戲體驗。

屯門友都知道市中心得三間戲院，分別是UA、凱都及巴倫紐，論質素當然是UA行先，但老實講情侶去睇戲兩張戲票已經2百元，加埋食飯行街，5嚿水都冇走雞，若然一家大細更加是高價消費，所以不少巴打都視「巴倫紐」為「窮人恩物」。其實這位在巴倫紐中伏的巴打也是「偏向虎山行」，他原來早於半年前已在「巴倫紐」睇過《幸運是我》，但因為遲了睇《一念無明》，不少戲院已經落了畫，而屯門就只得「巴倫紐」還有得睇，焗住要博一博。

這位巴打提到半年前未有爛幕，而現在的大銀幕是「左邊裂咗忽、右邊仲有條痕」，左右兩邊出口的指示牌，比銀幕還要光亮。有網民留言回應指，不但有裂痕，還說在4號院天花板有條電線吊下來條條揈，但比起戲院的隔音，裂痕只是小兒科，更有不少網民身同感受，紛紛留言「睇《一念無明》曾志偉話除咗揸車仲識做咩？後邊即聽到鍊車聲」、「明明冇裝修，一年365日都聽到裝修聲」、「上次睇《Why Him》飛車聲大到聽唔到女主角講乜？」，更有網民嘲笑「一張戲飛雙重享受，仲想點？」。

除了視聽「享受」不講得笑，有巴打留言指戲院有陣怪味，而且地下「黐笠笠」，另一邊廂有網民留言話「因為啲爆谷成日爆唔開，所以掉咗啲落地下」，甚至有人在戲院內吸煙及食叉雞飯，戲院的管理及衛生也不是一朝一夕的問題。

今個星期六、日，加上5月1日勞動節假期，很多打工仔總共有3日假期，銅鑼灣、旺角肯定是人多車多逼餐飽，甚至連睇戲都隨時買不到戲票，莫非真的要逼到入屯門「巴倫紐」，體驗視聽觸覺的另類感受？少年你太年輕了，莫講話早場的35元戲票平盡全港，正場票價亦只是60元，比起市區戲院隨時平一半，加上屯門巴打鬧歸鬧，原來他們在「巴倫紐」內，亦有不少同情人拍拖，家人共享天倫的溫馨回憶，等於睇TVB大的觀眾，仍舊是一邊鬧一邊睇。在巴倫紐睇戲的難得經驗，應該只得屯門友享有。